Дали персонализираната исхрана засекогаш ќе ги промени нашите оброци?

Експертите за гастрономија и здравствените ентузијасти едногласно ја прогласија персонализираната исхрана за водечки тренд во 2025 година. Тие предвидуваат дека интересот за дневни менија што се темелат на индивидуалните потреби на телото засекогаш ќе го променат начинот на кој ги избираме оброците.

Благодарение на технологијата и на апликациите за здрав живот, вртоглаво расте интересот за диети приспособени според генетскиот профил и специфичните нутритивни потреби.

Напредните тестови за микробиом (заеднички збор за сите микроорганизми што живеат во/на телата на сите живи суштества, вклучувајќи ги и луѓето, н.з.) сега на нутриционистите им овозможуваат да креираат планови за исхрана што го оптимизираат здравјето на поединецот. Вакви програми сѐ погласно се нудат и на домашниот пазар, а во зависност од преференциите на клиентот чинат од 2.500 до 6.000 денари месечно.

„Сѐ повеќе Македонци се вртат кон индивидуален пристап во исхраната, особено оние што се соочиле со здравствени проблеми или неуспешни диети. Иако сè уште постои навика за брзи и генерални совети, свеста за важноста на персонализираниот начин на исхрана расте, особено кај оние со покомплексни потреби, како дијабетес, хормонален дисбаланс, дигестивни проблеми или проблеми со тежината. Овој тренд добива сериозно внимание во последно време, односно луѓето сè повеќе инвестираат во себе и во долгорочни решенија“, вели Антонио Велковски, магистер по нутриционизам.

Антонио Велковски, магистер по нутриционизам Приватна архива

 

Велковски, кој е и основач на платформата „Ајде да јадеме“, преку која промовира балансиран и одржлив однос кон исхраната, за „Блумберг Адрија“ открива дека овој концепт станува исклучително популарен кај луѓето од бизнис-секторот.

„Ова е идеално решение за нив, токму затоа што програмите се приспособени на динамичниот живот. Многу мои клиенти добиваат едноставни, брзи и нутритивно балансирани оброци што можат да ги приготват или понесат со себе, без комплицирање. Се радувам што сè повеќе компании вложуваат во благосостојбата на вработените и ме канат на настани за тим билдинг, каде што за 15 минути приготвуваме брзи и здрави оброци, а истовремено и се едуцираме“, вели тој.

И клиентите на Емилија Спасовска Мојсовска, исто така магистерка по нутриционизам, покажуваат сѐ поголем интерес за моментално најголемиот тренд во гастрономијата. Таа се радува што сè повеќе луѓе во Македонија ја сфаќаат важноста на персонализираниот пристап кон исхраната не само како тренд туку и како алатка за вистинска промена. 

Емилија Спасовска Мојсовска, магистерка по нутриционизам Приватна архива

 

„Клиентите бараат повеќе од диета, бараат разбирање, поддршка, реални резултати, а ние им препорачуваме класични оброци од нашето поднебје, кои се приготвуваат едноставно и брзо“, вели Спасовска Мојсовска, која наедно е и менаџерка и сопственичка на „Нутри Ем“, компанија за услуги и советување во областа на нутриционизмот, здравиот начин на исхрана и здравите навики.

Што се анализира и што е клучно?

Менито што се креира според конкретните потреби, цели, здравствената состојба, животниот стил, па дури и вкусот на клиентот се нарекува персонализирана исхрана. Станува збор за процес што не се занимава со броење калории и секој план е уникатен и приспособен на здравјето, стилот на живот и личните цели на поединецот.

„Нема шаблон што одговара за сите. Она што е здраво за еден, може да не е соодветно за друг. На пример, кај лицата со синдром на иритабилно дебело црево (IBS), нутритивниот пристап се приспособува во зависност од поттипот на состојбата - кај некои доминира дијареја, кај други констипација, а кај трети постои комбинација од двете. Индивидуалниот пристап вклучува анализа на навиките, евентуални здравствени состојби, енергетски потреби и психолошкиот однос кон храната“, вели Велковски.

Според него, најважно е програмата да биде креирана од едуциран професионалец, кој ќе ги земе предвид здравствената слика, навиките и целите на клиентот, односно да има холистички пристап. Трансформацијата не треба да биде нагла и ригорозна, туку постепена и реална. 

Depositphotos

 

И Спасовска Мојсовска нагласува дека здравствената анамнеза и адекватно пласираните информации се најважни за изработката на индивидуален режим на исхрана.

„Клучно при изборот на персонализирана програма за исхрана е довербата. Доверба во стручноста на оној што го креира планот и во процесот, кој ја подобрува не само физичката форма туку и целокупното здравје и ментална благосостојба“, вели таа.

Кои се предностите?

Персонализираната исхрана води кон одржливи резултати, едногласни се нашите соговорници. Велковски објаснува дека наместо краткорочни диети, клиентите добиваат насоки што функционираат за нивниот животен ритам, што значи помалку фрустрација и повеќе доследност. 

„Дополнително, се намалува ризикот од нутритивен дефицит или непотребен стрес врз телото“, вели тој.

И Спасовска Мојсовска истакнува дека персонализираната исхрана ни дава структура, но и слобода и дека не ни наложува, туку нѐ поддржува.

„Тоа е пристап што носи трајни промени, со помалку притисок и повеќе грижа за себе, доволно да нѐ насочи, но истовремено да нѐ потсети дека балансираниот начин на живот е превенција од хронични незаразни заболувања“, вели таа.

Нашите нутриционисти сметаат дека персонализираната исхрана ќе добива сѐ поголемо внимание и дека веќе сериозно се наметнува како начин на живот.

„Веќе не зборуваме за диета, туку за нов, здрав однос со храната. Персонализираната исхрана ве учи како да се храните свесно, со љубов кон себе. Тоа е промена што останува“, вели Спасовска Мојсовска.

Велковски, пак, дополнува дека персонализираниот пристап започнува со план, но дека завршува со стекната вештина што останува засекогаш. 

„Со текот на времето изборот на оброци станува автоматски, интуитивен и без грижа на совест“, вели тој.

Велковски смета и дека треба се поведе иницијатива консултациите со квалификувани нутриционисти да станат дел од редовните систематски прегледи од најмали нозе. Според него, таквиот пристап би придонел не само за навремена превенција од хронични болести туку и за повисок квалитет на живот на индивидуата, зголемена продуктивност и поздрава нација.

„Бенефициите би биле и здравствени и финансиски, како за индивидуата така и за компаниите и државата. Во Канада, Австралија, па и добар дел од европските земји нутриционистите се интегрирани во примарната здравствена заштита, градинките, домовите за стари лица...“, вели тој.