Зошто микробилките се повеќе од тренд во исхраната?

Луѓето сакаат да се хранат поздраво, а тоа го покажа и неодамнешниот извештај на ФМИ (Здружението за прехранбена индустрија) во кој се наведува дека 44 отсто од продавниците го зголемуваат просторот за свежи производи. И агенцијата за истражувања на пазарот „Минтел“ во своите јунски извештаи посочи дека „има значителен раст на претпочитањето на потрошувачите за поздрава, посвежа и храна со поголема нутритивна вредност“.

Токму таков производ, храна со висока хранлива вредност и концентрација на корисни соединенија, се микробилките за кои последните десет години интересот молскавично расте. Глобалниот пазар на овие минијатурни растенија беше проценет на 1,77 милијарди долари во 2022 година и се очекува да достигне 5,82 милијарди долари до 2031 година со годишна стапка на раст од 14,31 отсто во текот на прогнозираниот период од 2023 до 2031 година. 

За оваа „суперхрана“, како што ја нарекуваат, се’ поголем интерес покажуваат и земјите во регионот Адрија. До неодамна, микробилките на ова поднебје беа користени главно како декоративен елемент во одбрани ресторани за да додадат визуелна привлечност на чиниите, но денес нивната улога во кулинарството значително се проширува.

Извор: Sanja’s Microgreens

„И македонските граѓани сè повеќе бараат храна која е не само вкусна, туку и хранлива“, вели Сања Бачевски, инженерка по хортикултура која речиси пет години во стариот град на Охрид одгледува микробилки и јадливо цвеќе и една од ретките во земјава која се обидува да ја подигне свеста за овие висконутритивни растенија.

Во нејзината микро градина има микробилки од пченка, брокула, сончоглед, ротквици, црвена и зелена зелка, бел синап, грашок и од уште неколку видови кои ги произведува за лична употреба. Истакнува дека овие растенија не само што се богати со хранливи материи, туку и на јадењето му даваат посебен шмек и текстура. На домашната трпеза таа редовно има и хранливи цвеќиња кои на Балканот се’ уште немаат широка примена.

„Настурциумот има блага пиперова арома, виолата е деликатна и декоративна, а бегонијата им дава киселкаста, освежителна нота, но и визуелна привлечност на салатите и десертите“, открива таа за „Блумберг Адрија“.

Бачевски минатата година го основа и стартапот „Сањас Микрогринс“ (Sanja’s Microgreens), концепт кој на заинтересраните туристи им нуди несекојдневно гастрономско искуство-бранч со микробилки. Менито се состои од иновативна храна со која, како што вели, сака да ја нагласи важноста на свежите органски состојки и хранливите својства на микробилките и во најголем дел е инспирирано од традиционалната македонска кујна. Турлитава со инфузирано масло од магдонос и микробилки, ѓомлезе послужено со микробилки, масло од тиква и јадливи цвеќиња и раванија прилагодена со употреба на лажен кавијар направен од домашен сок од вишна и јадливи цвеќиња се дел од оброците кои можете да ги пробате на нејзината домашна тераса, сите спарени со соодветни локални вина. 

„Овој бранч кој чини околу 30 евра по лице, гостите го препознаваат не само како оброк, туку и како културно и кулинарско искуство кое ја обединува локалната традиција со модерните и здрави трендови“, вели Бачевски.

Покрај Македонците, најголем интерес за нејзината кујна покажуваат туристи од Западна Европа, особено од Германија, Шпанија и од скандинавските земји кои се познати по нивната наклонетост кон здрава исхрана и органски производи.

Извор: Sanja’s Microgreens

Што се микробилки и зошто се храна на иднината?

Микробилки се млади хранливи растенија кои се собираат во рана фаза, кога ќе им пораснат првите листови. Некои зеленчуци не се јадливи како микробилки поради токсичните молекули во внатрешноста на централното стебло и/или во листовите. Такви се, на пример, доматот и компирот.

Микробилките се користат како додаток на салати, шејкови, сендвичи и други јадења, зголемувајќи ја нивната нутритивна вредност и подобрувајќи им го вкусот. Поради бројните здравствени придобивки ги нарекуваат „храна на иднината“.

„Микробилките содржат значително повеќе витамини и минерали во споредба со зрелите растенија, лесни се за варење и може да помогнат во подобрување на дигестивниот систем. Дополнително, придонесуваат за јакнење на имунитетот и се одличен избор за луѓе кои бараат начин да внесат повеќе хранливи материи без да консумираат големи количини на храна“, истакнува нашата соговорничка.

Како се садат и одгледуваат?

Постапката за садење микробилки е едноставна. Во саксија или во плиток сад прво се става тенок слој почва или кокосов супстрат. Потоа, семето се расфрла рамномерно и лесно се притиска во почвата. Треба умерено да се полева неколку пати во текот на денот, а најдобро расте на индиректна светлина. Микробилките обично се „потстрижуваат“ од седмиот до 21-от ден по нивното ртење. Кога ќе достигнат висина од околу пет до десет сантиметри, се сечат над почвата и подготвени се за консумирање. Лесното садење и одгледување во контролирани услови и во урбани средини ги прави идеални дури и за почетници во градинарството.

„Во време кога популацијата расте, а ресурсите се намалуваат, единствено ваквиот тип на производство може да обезбеди ефективно решение за одржлива и хранлива исхрана“, децидна е Бачевски.