Од функционална храна до мени за астронаути: Како ќе се храниме во иднина?

Пандемијата на ковид-19 комплетно го промени начинот на кој размислуваме за нашето мени. Агенцијата за истражувања на пазарот „Минтел“ во јуни годинава истакна дека има значителен раст на претпочитањето на потрошувачите за поздрава, посвежа и храна со поголема нутритивна вредност, а тоа го потврдуваат и бројките. Истовремено се бараат пооптимални и поздрави, но и опции со подолг рок на траење, па сѐ поголем е интересот за функционална храна, која по дефиниција, освен основна нутритивна вредност, има и потврдена здравствена придобивка. Глобалниот пазар на функционална храна беше проценет на 189,5 милијарди долари во 2021 година и се очекува да достигне 285,3 милијарди долари во 2030 година, со годишна стапка на раст од 4,52 отсто.

И македонските потрошувачи сѐ повеќе се заинтересирани за функционална храна, а овој растечки тренд во исхраната веќе го препознаваат и локалните производители. Еден од нив е Благојче Најдовски, магистер по земјоделски науки, кој смета дека иднината на гастрономијата е токму во таквата храна. Овој искусен пчелар посветено работи на развој на нови и иновативни функционални прехранбени производи, кои, како што вели, ќе им помогнат на луѓето да живеат поздрав и подолг живот. Најдовски нагласува дека е особено важно да се издигне свеста кај потрошувачите за придобивките од консумирање домашна, здрава и пред сѐ локално произведена храна. „Не е исто да консумирате кинески мед, кој го има на рафтовите на маркетите, а кој во основа се продава како безбедна храна“, вели тој.

Барајќи спас за пчелите, кои сѐ повеќе умираат поради влијанијата од климатските промени, Најдовски одлучил да развие уникатен протеински продукт за исхрана на човекот, кој е комбинација од леблебија и трутовски ларви. За овој производ на база на инсекти лани доби и награда на натпреварот „Зелени идеи“, кој поддржува развој на мали, локални и одржливи бизнис-идеи на Западен Балкан. За производство користи технологија на лиофилизација, со која се приготвува и храната за астронаутите. Овој негов рецепт се покажува како успешен обид, кој го охрабрува да продолжи да произведува висококвалитетна храна за луѓе.

Приватна архива

„Мојот нов производ е комбинација на лиофилизирана калинка, дива шипка и цвекло, која во форма на прав се додава на медот и се добива природен имунобустер со големи здравствени придобивки“, раскажува Најдовски.

Лиофилизираната храна е всушност дехидрирана храна, која ги задржува сите хранливи својства и истиот вкус и арома. Овој процес одамна познат и применлив во светот создава исклучително здрава храна, но е доста скап и троши доста енергија во производството. Затоа Најдовски одлучува да развие сопствен лиофилизатор, кој подоцна го презентира на Европскиот институт за иновации и технологија во Варшава и стигнува до финалната фаза на натпреварот.

„Создадов машина што ги суши производите на минус 40 степени во вакуум, каде што како финален производ може да добиете мед во прав и цела дузина овошје, зеленчук и шумски производи во прав, како шипка, боровинка, калинка и цвекло, кои имаат докажани здравствени придобивки. Поради високата содржина на вода тие досега не можеа да се мешаат со медот, кој,пак, не смее да има повеќе од 20 проценти вода во својот состав заради ферментација и скиснување“, објаснува нашиот соговорник.

Приватна архива

Иако станува збор за скап процес, Најдовски смета дека лиофилизираната храна во иднина ќе наоѓа сѐ поширока примена затоа што е со долг рок на траење и складирање и не бара чување во фрижидер, а истовремено ги задржува вкусот и повеќето хранливи материи.

За функционалната храна на Најдовски сѐ поголем е интересот и во соседна Србија, особено откако во мај годинава два негови иновативни рецепти (путер со лешници од мед и мед со шипка и цвекло во прав, н.з.) освоија златни медали на Меѓународниот земјоделски саем во Нови Сад.

„Тоа што ги прави единствени и уникатни овие два деликатеса е медот од драка (чалија) од кој се направени“, вели Најдовски, кој на крајот ни откри дека за неговите производи веќе контактирала со него и една британска компанија, со која е во фаза на преговори.

Во моментов нема коментари за веста. Биди прв да коментира...

Остави коментар