Финансискиот директор на „Тесла“ си оди од фирмата со 590 милиони долари

Сепак излегува дека управувањето со финансиите во компанијата на најбогатиот човек на светот може да биде профитабилна работа.

Захари Кирхорн, кој во понеделникот се повлече од функцијата главен финансиски директор на „Тесла“, создал богатство од 590 милиони долари за време на неговиот четиригодишен мандат на оваа позиција, покажуваат податоците на „Блумберг“. Неговиот имот претежно се состои од акции на „Тесла“, кои ги добил како компензација.

Сепак, богатството што го акумулирал финансискиот директор во заминување на производителот на електрични автомобили е бледо во споредба со она на извршниот директор Илон Маск, чие богатство од 230,6 милијарди долари е најголемо во светот според индексот на милијардери на „Блумберг“.

Кирхорн и другите директори на „Тесла“ не беа вклучени во огромните исплати што управниот одбор на компанијата му ги додели на Маск во 2018 година, што ја забрза неговата траекторија до врвот на скалата на светски богаташи.

Настрана од пакетот акции, кој има нето-вредност од околу 550 милиони долари, приходите на Кирхорн беа релативно скромни: 300.000 долари основна плата во 2022 година.

Не е познато каде ќе ја продолжи Кирхорн својата кариера. Инженерот образован на Харвард и Универзитетот во Пенсилванија работеше за Маск во „Тесла“ од 2010 година, а аналитичарите го сметаа за мирна и одмерена противтежа на неговиот бомбастичен шеф при презентациите на финансиските резултати на компанијата.

Пред да ѝ се приклучи на автомобилската компанија, тој работеше како аналитичар во „Мекинзи“ (McKinsey & Co.) и стажираше во „Мајкрософт“.

„Тој работеше за Илон 13 години, што е еквивалент на работа за која било друга компанија за 50 години“, изјави за „Блумберг“ Џин Манстер, управен партнер на „Дипватер асет менаџмент“ (Deepwater Asset Management). Кирхорн се сметаше за еден од кандидатите за наследник на Маск, пишува „Блумберг“.