.webp){kind=icon}
Швајцарската фармацевтска компанија „Рош“ (Roche) во понеделникот објави дека ќе плати 7,1 милијарда долари за купување на „Телавант“ (Telavant) за да ја зајакне својата работа на експериментален развој на лекови.
Ова ќе му даде на „Рош“ права да развива и продава во САД и Јапонија ветувачка нова терапија за воспалителна болест на цревата, наречена RVT-3101, која моментално е во клинички испитувања.
„Рош“ додава дека на краток рок ќе плати дополнителни 150 милиони долари во зависност од постигнувањето на зацртаните цели во фазата на развој на лекови.
Терапијата со антитела развиена од „ Телавант “, инаку во сопственост на „Роивант“ (Roivant Sciences) и „Фајзер“, има нов начин на дејствување што ги таргетира воспаленијата и фиброзата, давајќи ѝ потенцијал за употреба во голем број други болести, објави „Рош“. Претходните испитувања покажаа дека лекот, кој може да се администрира дома со инјектирање, може безбедно да го користат пациентите.
„Рош“ неодамна беше под притисок да го подобри својот сегмент за развој на лекови бидејќи вишокот приходи од производите користени за време на пандемијата полека завршува. Швајцарската компанија објави дека ќе започне со глобални клинички испитувања од третата фаза за RVT-3101 што е можно поскоро.
Акциите на „Рош“ драстично паднаа минатата недела, откако компанијата не успеа да ги ревидира нагоре своите финансиски цели и објави пад на кварталните приходи.
Извршниот директор Томас Шинекер се соочува со два предизвици: загуба на приходи од повеќе милијарди долари поврзана со пандемијата и сомневања меѓу инвеститорите дали компанијата има способност успешно да ги заврши своите најважни проекти.
Шинекер вети дека ќе работи на подобрување на продуктивноста во сегментот на истражување и развој.Според него, постојното развојно портфолио ќе може да го стимулира растот.
„За нас е важно, без разлика дали се работи за рана или доцна фаза, развојот да има смисла и од научна и од финансиска перспектива“, вели Шинекер.
Воспалително заболување на цревата е група на хронични гастроинтестинални нарушувања кои погодуваат речиси осум милиони луѓе ширум светот и 80 отсто од нив не можат да најдат постојана терапија.
„Телавант“ беше формиран минатата година за да го развие и комерцијализира RVT-3101 во САД и Јапонија. „Роивант“ има 75 проценти од него, а „Фајзер“ останатите.
