Падот на продажбата на големо ги намали приходите на „Макпетрол“

Пад на приходите и на добивката на дистрибутерската нафтената компанија „Макпетрол“ во деветте месеци годинава покажуваат последните податоци од билансот на успех што е објавен денеска. Вкупните приходи се на ниво од 22,83 милијарди денари (над 370 милиони евра), што е за 5,05 милијарди денари (82 милиони евра) или за 18,12 отсто помалку од истиот период лани.

Од компанијата велат дека падот се должи на намалените приходи на големо, кои се лизнале за повеќе од 55 проценти, а токму тие приходи учествуваат со над 13 отсто во вкупните приходи од продажбата. „Главни причини за намалување на приходите на големо се падот на продажбата на природен гас од 35,53 отсто и падот на продажбата на млазно гориво од 48,5 отсто“, се наведува во извештајот.

Макпетрол АД Скопје

Во текот на првите девет месеци од 2023 година бил зголемен количинскиот промет со нафтени деривати на мало за над 6,7 отсто, а прометот во малопродажба се зголемил за повеќе од 16 проценти.

„Но и покрај зголемувањето на количинскиот промет, приходите на мало бележат пад од 6,07 отсто како резултат на намалувањето на цените на нафтените деривати на светските берзи, кои како набавни цени зафаќаат најголем дел од малопродажната цена на дериватите. Расходите за набавна вредност на трговски стоки, односно набавните цени, се расходи врз кои друштвото има лимитирано влијание. Истото тоа се должи на регулирањето на најголем дел од набавните цени на нафтените деривати. Доколку набавната цена на одреден дериват не е регулирана, истата таа зависи од комплетно екстерни глобални фактори и движења, како што се цените на нафтените деривати на светските берзи и курсот на денарот во однос на доларот“, објавија од „Макпетрол“.

Во периодот од јануари до крајот на септември компанијата остварила добивка пред оданочување во износ од 744,14 милиони денари (12 милиони евра), наспроти остварената во истиот период минатата година, која изнесувала 1,04 милијарда денари.

Макпетрол АД Скопје

Намалувањето на добивката пред оданочување од 297,57 милиони денари или 28,57 отсто од компанијата го правдаат со намалената големопродажба на енергенти од 35,86 отсто, како и со нестабилноста на цените на нафтата на светските берзи. „Дополнително, врз падот на добивката значајно влијае и покачувањето на платите на вработените за надминување на економската криза и подобрување на животниот стандард на вработените, кои се најголемата сила и движечка енергија на ’Макпетрол’ АД“, велат од „Макпетрол“.

Во моментов нема коментари за веста. Биди прв да коментира...

Остави коментар