.webp){kind=icon}
Фондот за јавни инвестиции на Саудиска Арабија ќе купи 10 проценти од акциите на лондонскиот аеродром „Хитроу“ како дел од прегрупирањето на акционерите, со што ќе стане делумен сопственик на еден од најпрометните аеродроми во Европа заедно со Катарската инвестициска управа.
Фондот го купува уделот бидејќи шпанскиот „Феровиал“ (Ferrovial) го продава својот удел од 25 проценти. Останатите 15 проценти во сопственост на шпанската фирма ги купува „Ардијан“(Ardian), приватна компанија со седиште во Париз. За „Феровиал“ договорот носи неочекувана добивка од 2,37 милијарди фунти (3 милијарди долари) за холдинг што претходно беше проценет на нула.
Фондот за јавни инвестиции, попознат како ПИФ, стана главна инвестициска сила ширум светот бидејќи саудискиот престолонаследник Мохамед бин Салман, де-факто лидерот на Саудиска Арабија, ја преобликува земјата богата со нафта со свој бренд на државен капитализам. Фондот, дел од конзорциумот што ја купи единицата за кули на „Водафон“ (Vodafone Group Plc) во 2022 година, има за цел да достигне имот од два трилиони американски долари до 2030 година. Тоа би го направило ПИФ најголемиот фонд во светот, титула што сега ја има нафтениот фонд на Норвешка.
„Феровиал“ чии интереси во аеродромските услуги ја опфаќаат Велика Британија, Турција и удел во еден терминал на њујоршкиот „Џон Ф. Кенеди“ претходно месецов соопшти дека размислува за продажба на уделот во „Хитроу“. Воздушниот сообраќај се врати во живот откако беше десеткуван за време на пандемијата на ковид-19, помагајќи му на „Хитроу“ да ги намали загубите во првите девет месеци од оваа година.
Со излегувањето на шпанската компанија завршува речиси дведецениската сопственост на аеродромот во Британија. Таа купи мнозинство во аеродромскиот оператор, тогаш наречен „БАА Плц“ за 18,8 милијарди долари во 2006 година, а потоа го намали својот удел на сегашните 25 проценти.
„Ардијан“ и саудискиот јавен фонд ќе им се придружат на постојните сопственици, вклучително и Катар, кој има 20 проценти, и помалите инвеститори ЦДПК (Caisse de dépôt et placement du Québec), суверениот фонд на Сингапур (GIC) и „Алинда Капитал Партнерс“ (Alinda Capital Partners) од САД. Сите имаат удел под 13 проценти.
Акциите на „Феровиал“ се зголемија за дури 3,2 проценти до 31,94 евра. Аналитичарите во „Ситигруп“ (Citigroup Global Markets) велат дека планираното отуѓување е позитивно за инфраструктурната компанија „бидејќи готовинскиот принос треба да помогне да се намали нето долгот и секоја потенцијална распределба на акционерите преку дивиденди“.
Додека аеродромот во Обединетото Кралство останува главна глобална порта, неговите изгледи за раст се запрени поради недостигот од напредок на третата писта, ограничувајќи го капацитетот на „Хитроу“ додека дестинациите како Турција, Катар и Дубаи агресивно ги прошируваат своите аеродроми, честопати деноноќно.
Одлуката на Британската агенција за конкуренција од минатиот месец за таксите за слетување, предизвика незадоволство и кај авиокомпаниите и кај „Хитроу“: превозниците сакаа да се намалат трошоците, а аеродромот „Хитроу“ се обиде да наплати повисоки такси.
„Хитроу“ е главна дестинација за летови од регионот на Персискиот залив, со „Емирати“ (Emirates), „Катар Ервјес“ (Qatar Airways) и „Етихад Ервејс“ (Etihad Airways PJSC) кои го опслужуваат центарот со повеќе летови дневно. Саудиска Арабија е во процес на проширување на својата авио индустрија, настојувајќи да привлече повеќе бизнис и туризам во земјата. Неодамна го создаде „Ријад Ер“ (Riyadh Air), нова авиокомпанија која ќе оперира како додаток на постоечкиот авиопревозник „Саудиа“.
Договорот за „Хитроу“ подлежи на одобренија, како што се и правата на постојните акционери да се приклучат на трансакцијата како продавачи или купувачи според претходен акционерски договор.
„Феровиал“ рече дека останува посветена на унапредување на својот аеродромски бизнис. Поседува 50 проценти удел во аеродромите во Абердин, Глазгов и Саутемптон во Британија, 60 проценти од аеродромот „Даламан“ во Турција и 49 проценти од новиот терминал на ЏФК.
