.webp){kind=icon}
„Гаспром“ побара документи од „Сименс“ кои ќе овозможат враќање на гасната турбина клучна за гасоводот „Северен тек 1“ по ремонтот во Канада.
Документите, кои рускиот гасен гигант ги побара во петокот, треба да овозможат турбината да се врати назад во компресорската станица Портоваја (клучен објект за „Северен тек 1), во услови на санкции од Канада и Европската унија, соопшти „Гаспром“ во соопштение објавено денеска.
Спорот на „Гаспром“ со „Сименс Енерџи“ го зголемува притисокот врз европскиот пазар на гас поради растечката загриженост за иднината на рускиот проток во услови на тензии поврзани со војната во Украина.
Прочитај повеќе
Гаспром: Поради опремата на Сименс, неизвесност за Северен тек 1
Ова се чини дека доста го компликува враќањето во нормала на протокот на гас од Русија долж овој гасовод, со што полека се исполнуваат црните сценарија.
13.07.2022
На почетокот на оваа недела, рускиот производител соопшти дека бидејќи нема никакви документи кои му дозволуваат на „Сименс енерџи“ да ја премести турбината од Канада, не може да донесе објективен заклучок за понатамошниот развој во врска со безбедното работење на компресорската станица во Портоваја.
На објектот, кој е влезна точка за гасоводот „Северен тек 1“ на руската страна на Балтичкото Море, му се потребни шест големи турбини за да може гасоводот да работи со полн капацитет. Една од компонентите е во Канада, а според „Гаспром“, не сите турбини во Русија се во работна состојба и треба да одат на одржување во фабриката на производителот „Сименс енерџи“ во Монтреал.
Како резултат на ваквата ситуација, испораките преку „Северен тек 1“ беа намалени на само 40 отсто од нивниот капацитет минатиот месец, пред целосно прекинување на врската на 11 јули заради планираното одржување, кое се очекува да трае 10 дена.
„'Гаспром' смета на безусловно исполнување на обврските на 'Сименс' во однос на одржувањето на турбините, oд што зависи ефикасното работење на гасоводот 'Северен тек 1' и снабдувањето со природен гас за европските потрошувачи“, изјавија од рускиот производител.
Минатата недела Германија побара од Канада да ја пушти опремата. Властите во Отава изјавија дека ќе ги решат сите прашања со Германија, бидејќи трансферот на компонентата во Русија е забранет со санкции. Канада издаде дозвола за извоз на санкционирана опрема во Германија, а мерката се однесува и на другите турбини од „Северен тек 1“ за кои е потребно одржување во Канада.
