.webp){kind=icon}
„Мајкрософт“ (Microsoft Corp.) го престигна „Епл“ (Apple Inc.) и стана највредната јавно тргувана компанија во светот за првпат по повеќе од две години, бидејќи грижите за побарувачката на паметни телефони ги туркаат акциите на производителот на „ајфон“ во последните неколку недели.
Софтверскиот гигант со седиште во Редмонд, Вашингтон оствари раст од 1 отсто на 388,47 долари во петокот, завршувајќи со пазарна вредност од 2,89 трилиони долари. Во меѓувреме, „Епл“ доби 0,2 отсто и затвори со пазарна капитализација од 2,87 трилиони долари. Ова е првпат од ноември 2021 година „Мајкрософт“ да затвори со повисока вредност од „Епл“.
„Кога ќе ги споредите и спротивставите двете, растот што го покажува 'Епл' не е ништо посебно, додека 'Мајкрософт' направи подобра работа во извршувањето и демонстрацијата на растот на заработката“, вели Дејвид Кац, главен инвестициски директор во „Матрикс Асет“ (Matrix Asset Advisors), кој има позиции и во двете компании. „'Мајкрософт', исто така, има многу појасен патоказ со вештачката интелигенција и направи одлична работа артикулирајќи како ќе го забрза растот за да ги направи своите долгорочни изгледи уште попривлечни“.
„Мајкрософт“ во петокот затвори со повисока пазарна вредност од „Епл“
Bloomberg
Додека и двете компании беа дел од моќното рели на т.н. „седум величествени“ (Magnificent 7) во 2023 година, нивните богатства се разидоа оваа година. „Мајкрософт“ порасна за 3,3 отсто, поддржан од постојаниот оптимизам во врска со вештачката интелигенција, додека „Епл“ падна за 3,4 отсто поради зголемената загриженост за неговиот раст.
Помалку поволниот поглед на Волстрит кон „Епл“ сугерира дека не би било изненадувачки ако „Мајкрософт“ ја одржува или дури ја зголеми својата новостекната предност. Просечната целна цена на аналитичарите за „Мајкрософт“ е еднаква на зголемување од околу 8 отсто во наредните 12 месеци, малку над потенцијалот за враќање на „Епл“. Таквата добивка би резултирала со тоа што „Мајкрософт“ ќе надмине пазарна вредност од 3 трилиони долари, придружувајќи му се на „Епл“ како една од двете компании што достигнале таков праг.
„Мајкрософт“ и „Епл“ остануваат доминантни тешкаши во S&P 500, заедно чинејќи околу 14 отсто од вкупниот индекс. Малку други компании им се приближуваат по големина. Вредноста на нафтениот гигант „Сауди Арамко“ (Saudi Aramco) изнесува нешто повеќе од 2 трилиони долари, додека „Алфабет“ (Alphabet Inc.), „Амазон“ (Amazon.com Inc.) и „Енвидија“ (Nvidia Corp.) се проценуваат над 1 трилион долари. „Мета“ (Meta Platforms Inc.), која скокна за речиси 200 отсто минатата година, им се приближуба најблиску, а се наоѓа веднаш под прагот од трилион долари.
