„Опен еј-ај“ возврати на обвинувањата на Илон Маск

„Опен еј-ај“ возврати на тужбата поднесена против компанијата од страна на Илон Маск во објава на блог во вторникот, користејќи ја е-поштата на милијардерот за да покаже дека тој ги поддржува плановите на компанијата да стане профитабилен бизнис и дека инсистирал да собере „милијарди“ долари за да биде релевантна во споредба со „Гугл“.

Bloomberg

Маск минатата недела поднесе тужба против „Опен еј-ај“, главниот извршен директор Сем Алтман и претседателот Грег Брокман, тврдејќи дека стартапот отстапил од својата мисија да изгради одговорна вештачка интелигенција и дека станал должник на „Мајкрософт“, неговиот најголем инвеститор. Во објавата „Опен еј-ај“ рече дека Маск се решил да тужи откако се обидел и не успеал да ја направи компанијата дел од „Тесла“.  

„Ние сме тажни што дојде до ова со некој кому длабоко му се восхитувавме - некој што нè инспирираше да целиме повисоко, а потоа ни кажа дека нема да успееме, ни стана конкурент и нè тужеше кога почнавме да постигнуваме значителен напредок кон мисијата на ’Опен еј-ај’ без него“, се наведува во објавата на компанијата од неколкумина соосновачи на „Опен еј-ај“, вклучувајќи ги и Алтман, Брокман и Илја Сутскевер.

Објавата исто така репродуцираше е-пошта што Маск им ја испратил на луѓето во компанијата, демонстрирајќи дека милијардерот ги поддржал напорите на „Опен еј-ај“ за собирање средства. „За ова се потребни милијарди годишно веднаш или заборавете го“, напишал Маск во една е-пошта, според „Опен еј-ај“.

„Опен еј-ај“ како непрофитна организација собра помалку од 45 милиони долари од Маск и повеќе од 90 милиони долари од други донатори, според објавата. Маск ја поддржа компанијата да биде многу поамбициозна во собирањето средства. На самиот почеток, Алтман и Брокман планираа да соберат 100 милиони долари, пишуваат од „Опен еј-ај“, но Маск се спротивстави, велејќи дека сумата треба да биде поголема.

„Треба да одиме со многу поголема бројка од 100 милиони долари за да избегнеме да звучиме безнадежно во однос на она што го троши ’Гугл’ или ’Фејсбук’. Мислам дека треба да кажеме дека започнуваме со обврска за финансирање од една милијарда долари. Ова е реално. Ќе покривам сè што некој друг нема да обезбеди“, се наведува во објавата на компанијата.

Bloomberg Mercury

Маск во својата тужба тврди дека блиските односи на стартапот со „Мајкрософт“ ја поткопале неговата првична мисија за создавање технологија со отворен код ослободена од непотребно корпоративно влијание. „До денес, веб-страницата на ’Опен еј-ај’ продолжува да исповеда дека нејзината повелба е да се осигури дека вештачката интелигенција има корист за целото човештво“, се наведува во тужбата, мислејќи на општата вештачка интелигенција, моќен тип на вештачка интелигенција што сè уште не постои. „Во реалноста, сепак, ’Опен еј-ај’ се трансформира во затворен извор, де факто подружница на најголемата технолошка компанија во светот: ’Мајкрософт’“.

Според е-поштата во објавата, Маск се потпишал на идејата дека „Опен еј-ај“ нема да создава софтвер со отворен код за општа вештачка интелигенција и дека нема секогаш да ја споделува науката зад нејзиниот технолошки напредок. „Како што се приближуваме до изградба на вештачка интелигенција, ќе има смисла да почнеме да бидеме помалку отворени“, напишал Сутскевер во е-поштата од 2016 година, цитирана од стартапот. „Отвореното во ’Опен еј-ај’ значи дека секој треба да има корист од плодовите на вештачката интелигенција откако ќе се изгради, но сосема е во ред да не се споделува науката“, се наведува во е-поштата. Маск одговорил: „Да“.

Во објавата на блогот, соосновачите на „Опен еј-ај“ наведуваат дека Маск не секогаш се противел на корпоративното влијание во „Опен еј-ај“. Тие истакнуваат дека Маск се обидел да го направи „Опен еј-ај“ дел од неговата автомобилска компанија „Тесла“, пишувајќи го тоа во е-пошта: „’Тесла’ е единствениот пат за надеж дека ќе се одржи чекор со ’Гугл’. Дури и тогаш, веројатноста да се биде противтежа на ’Гугл’ е мала. Едноставно, не е нула“.

Од „Тесла“ не одговорија веднаш на барањето за коментар.

Маск го тужи „Опен еј-ај“ за прекршување на договорот, прекршување на доверителската должност и тврдења за нефер деловни практики, меѓу другите поплаки. Тој ја поднел тужбата во својство на донатор на непрофитната матична организација уште во 2019 година и се обидел да го принуди стартапот со седиште во Сан Франциско да престане да има корист лично од „Мајкрософт“ и Алтман.

Коавторската објава на блог од „Опен еј-ај“ го означува враќањето во јавност на Сутскевер, главниот научник и поранешен член на одборот, кој гласаше за соборување на Алтман во ноември, но подоцна се откажа од неговата одлука да му помогне да го отпушти.