Тикток утре ќе згасне во САД доколку нема јасен сигнал од Белата куќа

Тикток (TikTok) рече дека ќе биде принуден утре да „згасне“ во САД, освен ако нема јасна изјава од администрацијата на Бајден до давателите на услуги кои ја одржуваат неговата достапност. Вчерашните изјавите од Белата куќа и Министерството за правда „не успеаја да ја дадат потребната јасност и сигурност“ на давателите на услуги, соопшти компанијата во објавата на X.

Врховниот суд во петокот едногласно го потврди законот со кој се заканува затворање на популарната платформа за социјални медиуми во САД во недела. Претседателот Џо Бајден им рече на новинарите по пресудата дека одлуката за апликацијата ќе ја донесе неговиот наследник.

„Освен ако администрацијата на Бајден веднаш не даде дефинитивна изјава за да ги задоволи најкритичните даватели на услуги со уверување дека не се спроведува, за жал, Тикток ќе биде принуден да згасне на 19 јануари“, соопшти компанијата.

Кинеската матична компанија на Тикток – „Бајтденс“ (ByteDance Ltd.), треба да најде купувач за своите операции во САД или ќе се соочи со исклучување на 19 јануари според законот. Претседателот може да даде 90-дневно продолжување на тој рок доколку се водат сериозни преговори за купување.

Новоизбраниот претседател Доналд Трамп вети дека ќе го спаси Тикток, кој го користат 170 милиони Американци, и може да избере да го прекине спроведувањето на новиот закон откако ќе ја преземе функцијата во понеделник. Трамп и кинескиот претседател Шји Џјинпинг разговараа за „Тикток“ во петокот како дел од разговорот пред инаугурацијата.

„Мојата одлука за Тикток ќе биде донесена во не толку далечна иднина, но морам да имам време да ја разгледам ситуацијата“, рече Трамп во петокот во објава на социјалните мрежи.

Според законот, технолошките компании кои го хостираат и дистрибуираат Тикток - вклучително и „Епл“ (Apple Inc.) и „Гугл“ (Google) на „Алфабет“ (Alphabet Inc.) - ќе се соочат со изгледи за огромни казни ако продолжат да ја поддржуваат апликацијата. Тие ќе треба да одлучат дали гаранциите од администрацијата на Трамп обезбедуваат доволно правно покритие.

Трамп, кој се обиде да го забрани Тикток за време на неговиот прв мандат, оттогаш ја прифати апликацијата, припишувајќи ѝ заслуга за тоа што му помогна да го зајакне пристапот до младите гласачи. Претставници на администрацијата на Бајден посочија дека веројатно нема да го спроведат законот пред инаугурацијата на Трамп во понеделник. Бајден ја потпиша мерката како закон во април, откако доби одобрение од двопартиското мнозинство во Конгресот.

„Одлуката на судот му овозможува на Министерството за правда да ја спречи кинеската влада да го вооружи Тикток за да ја поткопа националната безбедност на Америка“, рече државниот обвинител Мерик Гарланд во изјава испратена по е-пошта по пресудата.