.webp){kind=icon}
Менаџери на успешни компании во земјава со последни обиди да се слушне нивниот глас од значајното влијание на поскапувањето на струјата. Глигор Цветанов, прв човек на Макпрогрес од Виница, компанија која се развива во земјава над 32 години вели дека ги прават сите напори да преживеат.
„Цената на енергијата руши рекорди: за понеделник 29.8.2022 надминува 800 евра за MWh, а за четвртиот квартал цената е преку 950 евра за MWh и продолжува да расте. Ова се цени кои ниеден бизнис самостојно не може да ги апсорбира. И по цена на загуби нема да може бидејќи сумите се вртоглави, а патот кон пропаста е сѐ поизвесен. За илустрација, сетете се колку сте платиле лани истиот месец. Сега е тоа помножено 10-пати до 12-пати. И тоа не трае еден месец. Трае и ќе потрае доволно долго за да ја однесе компанијата во пропаст, вели Цветанов.
Додава дека и покрај тоа што во пазарна економија секој треба да с еприспособи на пазарот, во овие шест месеци се случиле многу промени.
„Да градиш фирма, тимови, капацитети, брендови, пазари и да дојдеш до таква ситуација во која, и покрај сите вложени напори, едноставно повеќе не е до тебе. А многу напори се направени за да се штеди потрошувачката на секој чекор. Едноставно, натамошното штедење значи целосно затворање на производствените погони. Сега веќе е друго. Не можеш повеќе сам. Ти треба поддршка. Не го зборувам ова само во име на работодавците, туку како компанија, а во компаниите заинтересирани страни се и работодавците и вработените и соработниците, а богами и државата. Загрозен е опстанокот на сите заедно. Дами и господа од извршната власт, слушнете го гласот на коморите и на компаниите. Приватниот сектор е оној кој креира додадена вредност, кој вработува и кој плаќа даноци и давачки. Насекаде во светот приватниот сектор е главниот двигател и обезбедува развој и напредок на државата. Најдете модел и помогнете му, вели Цветанов.
Вели дека преку коморите континуирано реагирале до креаторите на економските политики за да се подобрат економските состојби во делот на конкурентноста, за да се намалат парафискалните давачки, за да се поедностават процедурите за градба, за да се поедностават процедурите за фотоволтаични централи, за да се сузбие сивата економија и слично.
„Направете консензус, и власт и опозиција и јавност и стручна фела; направете напори и најдете модел да им помогнете на компаниите; направете напор за да заштедите потрошувачка на енергија на други места, а да обезбедите домашна енергија за компаниите и да донесете уредба да им ја продадете таа енергија на компаниите по производствена цена преку државната „ЕСМ снабдување“, ако не целосно, барем до некоја количина, пример до 200-300 MWh месечно по компанија. Со ова ќе има можност да се спасат компаниите во кои засегнати страни се и работодавците и вработените и соработниците, а богами и државата, додава тој.
