„Ербиенби“ со позитивна летна сезона, но предупредува на забавување на растот

„Ербиенби“ (Airbnb Inc.) издаде прогноза за третото тримесечје подобра од очекувањата, поткрепена со охрабрувачка летна побарувачка за патувања, но предупреди дека стапките на раст можеби нема да се задржат до крајот на годината, поради споредбата со силните резултати од истиот период лани.

За трите месеци што завршуваат на 30 септември, компанијата за краткорочен наем соопшти дека растот врз основа на бројот на резервирани ноќевања и седишта, показател што внимателно се следи, се очекува да остане „релативно стабилен“ во однос на постигнатите 7,4 отсто во второто тримесечје, се наведува во писмото до акционерите објавено во средата. Тоа е приближно до растот од 7 отсто што го прогнозираа аналитичарите, според податоците на „Блумберг“ (Bloomberg).

Приходот за третото тримесечје се очекува да биде во рамките од 4,02 до 4,1 милијарди долари, при што средната вредност ја надминува просечната процена на аналитичарите.

„Додека гледаме напред кон третото тримесечје, охрабрени сме од тековните трендови на побарувачка“, наведува „Ербиенби“ во писмото до акционерите, додавајќи дека во јули е забележано забрзување на растот на бројот на ноќевања, особено во Северна Америка.

Сепак, компанијата очекува потешки споредбени резултати на годишно ниво кон крајот на тековниот период и во четвртото тримесечје, „што ќе создаде притисок врз стапките на раст подоцна во годината“. Финансиските резултати на „Ербиенби“ беа изненадувачки силни во втората половина од минатата година, откако патниците конечно ги реализираа патувањата што претходно ги одложиле.

Акциите на „Ербиенби“ паднаа за 6,3 отсто во продолженото тргување.

Во средата компанијата објави нова програма за откуп на акции во вредност до 6 милијарди долари, откако ги надмина очекувањата и оствари слободен паричен тек од 1 милијарда долари во второто тримесечје.

Извештајот на „Ербиенби“ следува по умерената прогноза на онлајн конкурентот „Букинг“ (Booking Holdings Inc.), кој предупреди дека сè поголемата економска неизвесност ќе ја намали побарувачката за патувања.

Инаку, резултатите на „Ербиенби“ за второто тримесечје во голема мера ги надминаа очекувањата, благодарение на „стабилниот раст на бројот на реализирани ноќевања“, соопшти компанијата.

Добивките биле особено силни во Латинска Америка и во азиско-пацифичкиот регион, каде што е забележан двоцифрен раст. Компанијата објасни дека тоа се должи на зголемениот број на корисници што првпат резервирале преку платформата во Бразил и Јапонија, како резултат на адаптација на производот и маркетингот според локалните преференции.

Од друга страна, резервациите од патници од Северна Америка придонеле за низок едноцифрен раст на бројот на ноќевања, и покрај одредено подобрување на побарувачката во текот на периодот, што главно било поттикнато од домашниот туризам.

Овој бавен раст влијаел на вкупните резултати, соопшти „Ербиенби“: ако се исклучи Северна Америка, која учествува со околу 30 отсто од вкупниот број на ноќевања и седишта, вкупниот раст на ноќевањата во тримесечјето би бил двоцифрен.

Стабилизирање на растот

„Ербиенби“ предупреди дека растот може да биде под притисок до крајот на 2025 година

 

Bloomberg

Компанијата не ги објави посебно резултатите за своите нови понуди – „Искуства“ (Experiences) и „А ла карт услуги“ (a la carte Services), лансирани во мај, преку кои патниците можат да резервираат туристички активности или да ангажираат професионалци како готвачи, лични тренери или фотографи.

Сепак, „Ербиенби“ соопшти дека свесноста за услугите расте, а почетните реакции од корисниците се позитивни. Исто така е забележан „значителен интерес од потенцијални организатори на активности“, со над 60.000 поднесени апликации од почетокот на иницијативата.

Овие нови категории ќе донесат повеќе од 1 милијарда долари годишен приход, изјави главниот извршен директор Брајан Чески, но ќе бидат потребни неколку години за да се развијат во поголем обем.

„Ербиенби“ го повтори износот што планира да го инвестира во новите деловни сегменти, велејќи дека ќе вложи 200 милиони долари. Оваа сума е во согласност со долната граница од распонот што беше презентиран пред инвеститорите во февруари. Според компанијата, влијанието на овие инвестиции врз профитните маржи ќе биде најизразено во втората половина од годинава.

Програма за лојалност

Лансирањето на новите бизниси, според компанијата, ја става во „подобра позиција“ да ги награди своите корисници преку програма за лојалност, изјави главниот директор за бизнис-развој Дејв Стивенсон за „Блумберг“ во интервју минатата недела, додавајќи дека ваква програма се разгледува за во иднина.

На конференцискиот повик со аналитичари во средата, извршниот директор Чески дополнително ја образложи оваа можност, но повтори дека „Ербиенби“ нема да понуди програма со поени, какви што користат конкурентите од хотелскиот сектор.

„Програма за лојалност или членство е нешто навистина, навистина привлечено за ’Ербиенби’“, изјави Чески. „Мислам дека понекогаш сме во конкурентска неповолност во однос на онлајн туристичките агенции и хотелите, бидејќи тие имаат многу програми што ние ги немаме. Затоа мислам дека има голем потенцијал доколку воведеме таква програма“.

„Ако и кога би направиле нешто, не мислам дека тоа би била традиционална програма со поени“, додаде тој. „Мислам дека би било нешто многу поинтересно и поиновативно. Апсолутно сметам дека треба да очекувате нешто од нас во иднина. Не веднаш, туку во иднина“.