Илон Маск ги поттикна шпекулациите дека може да се обиде повторно да преговара за преземањето на Твитер Инк., велејќи дека остварлив договор по пониска цена нема да биде „надвор од прашање“.
Вредноста на акциите на Твитер вчера падна за 8,2 отсто на затворањето на тргувањето во Њујорк. Акциите паѓаат поради шпекулациите дека Маск би можел да се повлече од аквизицијата од 44 милијарди долари. Загриженоста се зголеми во изминатата недела откако Маск ги доведе во прашање јавно објавените податоци на Твитер за процентот на спам и лажни сметки на неговата услуга за социјални медиуми.
Маск вчера продолжи и понатаму со изјавите на тој фронт. На технолошката конференција во Мајами излезе со проценка дека лажните корисници сочинуваат најмалку 20 проценти од сите сметки на Твитер. Тоа беше неговата најниска проценка за бројот на ботови на мрежата. Имено, Маск реторички постави прашањето „дали бројот на ботови може да биде и до 90 отсто?“.
„Во моментов она што ми се кажува е дека едноставно нема начин да се знае бројот на ботови. Тоа е неспознатливо како човечката душа.“, рече Маск на конференцијата.
Твитер одби да коментира. Компанијата со седиште во Сан Франциско квартално известува дека спам сметките сочинуваат помалку од 5 отсто од вкупните корисници.
Маск, главен извршен директор на Тесла Инк. и на Спејс Икс минатата недела рече дека неговата понуда за купување на Твитер е „привремено паузирана“ во очекување на детали за тоа колку спам и лажни сметки има на платформата.
Во текот на викендот, тој твитна дека планира да направи своја анализа на базата на корисници на Твитер користејќи случаен примерок од 100 кориснички сметки. Набргу потоа, Маск тврдеше дека правниот тим на Твитер се јавил да се пожали дека го прекршил нивниот договор за тајност откако јавно ја споделил методологијата на компанијата.
Извршниот директор на Твитер, Параг Агравал, го оспори ваквото тврдење и понуди повеќе детали за пристапот на компанијата кон сметките за спам. Агравал рече дека Твитер рачно проверува илјадници сметки секој квартал за да одреди колку треба да се сметаат како спам, но додаде дека процесот не може да се спроведува надворешно поради загриженоста за приватноста на корисниците.
Маск зборуваше на конференција организирана од подкаст наречен „Ол-Ин“ воден од Шамат Палихапитија, Џејсон Калаканис, Дејвид Сакс и Дејвид Фридберг. Настанот од 7.500 долари по човек беше распродаден, а организаторите рекоа дека новинарите биле исклучени од присуство. Маск се појави на самитот во Мајами преку видео конференција.
50-годишниот милијардер почна да купува акции на Твитер во јануари. Одборот на Твитер ја прифати понудата од 44 милијарди долари на Маск да ја купи и да ја преземе компанијата на 25 април, но договорот е далеку од затворање. Во меѓувреме, акциите на Твитер се тргуваат далеку под понудената цена.
Распонот помеѓу понудата на Маск од 54,20 долари за акција и цената на акцијата на Твитер продолжува да се проширува, бришејќи ги сите добивки на акциите откако Илон Маск го обелодени својот удел во платформата за социјалните медиуми.
.webp){kind=icon}
