Клучниот снабдувач на муниција за Украина, ЦСГ, планира ИПО во Амстердам

Производителот на оклопни возила и муниција Чехословачка групација - ЦСГ (Czechoslovak Group - CSG) соопшти дека планира излегување на берзата во Амстердам, што би можело да стане најголемата почетна јавна понуда во одбранбената индустрија досега.

Одбранбената компанија со седиште во Прага планира да продаде новоиздадени акции во вредност од 750 милиони евра (874 милиони долари), додека еден од акционерите ќе продаде засега неопределен износ од постојните акции, се наведува во соопштението објавено во средата. Како главни инвеститори во понудата се „Артисан“ (Artisan Partners), „Блекрок“ (BlackRock) и подружница на Катарската инвестициска управа, кои се обврзале заедно да преземат акции во вредност од 900 милиони евра.

„Сметаме дека ИПО на ЦСГ ќе го подигне профилот на групацијата во меѓународната инвестициска заедница и ќе обезбеди дополнителна финансиска флексибилност и разновидни извори на финансирање за поддршка на понатамошниот раст“, изјави претседателот и сопственик на компанијата Михал Стрнад.

Вкупната понуда би можела да достигне 3 милијарди евра или повеќе, изјавиле претходно добро упатени извори во процесот. Доколку се реализира таков износ, тоа би било најголемото ИПО во историјата на одбранбената индустрија, покажуваат податоците на „Блумберг“.

Bloomberg

Излегувањето на берза доаѓа во период кога акциите на одбранбените компании нагло пораснаа од почетокот на минатата година, откако европските влади најавија зголемени трошоци за безбедност по руската инвазија врз Украина. Овој раст охрабрува дел од најголемите играчи во европската одбранбена индустрија да подготвуваат планови за излегување на берза.

Француско-германскиот производител на тенкови КНДС (KNDS NV) соопшти во декември дека годинава ќе започне подготовки за почетна јавна понуда во Франкфурт и во Париз, во зависност од пазарните услови. Германската компанија за одбранбени технологии „Винкорион“ (Vincorion), според извештај на „Блумберг њуз“, размислува за излегување на берза уште во текот на овој квартал.

Присуство на Чехословачката групација (Czechoslovak Group)
Распределба на приходите на ЦСГ по региони, заклучно со првите девет месеци од 2025 година.

Bloomberg

ЦСГ, во сопственост на 33-годишниот милијардер Стрнад, забележа силен раст на приходите како резултат на тоа што Европа ги зголеми воените трошоци и испраќаше оружје во Украина. Тој во интервју во декември изјави дека сака групацијата да ја претвори во најголема одбранбена компанија на континентот.

Околу една четвртина од приходите на компанијата од 4,49 милијарди евра во првите девет месеци од 2025 година дошле од Украина, покажуваат деловните резултати објавени минатата година.

Корените на ЦСГ датираат од пред три децении, кога таткото на Стрнад ја основал компанијата „Екскалибур арми“ (Excalibur Army). Оттогаш групацијата се прошири преку преземања, меѓу кои и од страна на шпанската фабрика за муниција во Гранада (Fábrica de Municiones de Granada) во 2020 година, италијанската „Фиоки“ (Fiocchi Munizioni SpA) во 2022 година, како и од американскиот производител на муниција „Кинетик“ (Kinetic Group) во 2024 година.

Зделката ја организираат „БНП Париба“ (BNP Paribas SA), „Џефрис“ (Jefferies Financial Group Inc.), „ЏП Морган“ (JPMorgan Chase & Co.) и „Уникредит“ (UniCredit SpA), се наведува во соопштението.