Продажбата на „Ред бул“ расте со најбрзо темпо од пандемијата

„Ред бул“ (Red Bull GmbH) ја зголеми продажбата на својот енергетски пијалак со сино-сребрена етикета најмногу во последните три години, зголемувајќи ги ланските приходи и оперативниот профит на рекордно ниво, посочува весникот „Салцбургер нахрихтен“ (Salzburger Nachrichten).

Во 2025 година австриската компанија продаде речиси 14 милијарди лименки од кофеинскиот пијалак, што е над 10 отсто повеќе во однос на претходната година, покажуваат одредени метрики што компанијата ги сподели со локалниот весник. Нето-продажбата се зголеми за 8,6 проценти, на рекордни 12,2 милијарди евра.

Bloomberg Mercury

 

Во исто време, компанијата вработи речиси 2.000 работници, со што бројот на вработени се приближува до 22.000. Оперативната добивка исто така се зголеми на рекордно ниво. Портпаролот на „Ред бул“ не одговори на барањето за коментар.

Продажбата на пијалаци на „Ред бул“ и понатаму е главен двигател на растот дури и додека компанијата го проширува своето портфолио на спортски инвестиции. Спонзорските исплати на спортските ѕвезди за првпат во 2022 година надминаа една милијарда евра.

 

Холандскиот возач Макс Ферстапен минатата година ја пропушти петтата последователна титула во Формула 1 за тркачкиот тим во сопственост на „Ред бул“. Компанијата поседува фудбалски тимови во Германија, Њујорк и Бразил, а има и мнозински удел во друмскиот велосипедски тим БОРА-Хансгрое.

Како компанија со ограничена одговорност, која нема финансиски долг или јавно издава хартии од вредност, „Ред бул“ нуди увид во своето работење главно преку годишниот извештај што го поднесува до корпоративниот регистар на Австрија и годишните податоци за продажба објавени на официјалната интернет-страница на компанијата.

Традиционалните производители на енергетски пијалаци во САД се соочуваат со жестока конкуренција од компаниите што им продаваат производи без шеќер на клиенти што се грижат за здравјето. Лани „Ред бул“ го задржа својот пазарен удел од над 35 проценти на својот најголем пазар, покажуваат податоците на „Сиркана“ (Circana).

Bloomberg Mercury

 

Во меѓувреме, во Европската Унија „Ред бул“ се соочува со целосна истрага за обвинувањата дека се обидел да ја ограничи конкуренцијата од енергетските пијалаци нудејќи поголем обем од неговите традиционални лименки од 250 мл.

Марк Матешиц, син на покојниот основач на компанијата, минатата година доби дивиденда од 648 милиони евра врз основа на неговиот удел од 49 проценти. Членовите на семејството Тај Јувидја го поседуваат преостанатиот удел од 51 отсто.

„Нашите планови за раст и инвестиции во 2026 година повторно се многу амбициозни, предвидуваат континуиран тренд на раст и - како и секогаш во „Ред бул“ - ќе се финансираат од оперативниот паричен тек“, изјавија од компанијата за „Салцбургер нахрихтен“.