Едно евро за 5 клика на фејсбук: А кои наши компании се тиктокери?

Важно е да се биде лидер, а не „фоловер“ во дигиталниот маркетинг. Ваков е ставот на агенциите за маркетинг и за дата анализи, за кои можностите за рекламирање и промоција преку дигиталните канали, пред сѐ социјалните мрежи, се навистина сериозна инвестиција.

„Ако сега треба да инвестираш 1 евро за да добиеш 5 клика, порано со тој износ можеше да се добие континуирано внимание, досег и кликови од заедница од 500 фанови“, вели Мери Шешо Најденовска, менаџерка за маркетинг операции во Пиксел, агенција што се занимава со развој на софтвер, веб страници и дигитален маркетинг.

Приватна архива/Мери Шешо Најденовска, менаџерка за маркетинг операции во Пиксел

Поголемите компании и брендови, како тие од телекомуникацискиот сектор, пиварите и производителите на артикли за широка потрошувачка беа меѓу првите, кои се позиционираа на социјалните мрежи и затоа тие најлесно ги „заработија“ првите фанови и изградија заедница која потоа е лесно само да се надградува.

„Многу беше полесно порано да се добијат фанови (во денешно време фоловери или следбеници), да се добие вниманието од секој присутен на социјалните мрежи, отколку што е сега. Затоа, многу е важно да се биде лидер, не „фоловер“ во ваквите дигитални иновации. Следбениците потоа сами си доаѓаат“, вели Мери Шешо Најденовска од Пиксел.

Каква е состојбата со Тик Ток?

Агенциите во Тик Ток гледаат огромен потенцијал од маркетиншки аспект но, не и фирмите. Буквално се бројат на прсти македонските компании, кои што се присутни на оваа социјална мрежа, чија популарност не може да се занемари.

„За секоја нова работа треба да помине време за да биде прифатена, особено големите компании кои имаат процедурално работење и не се впуштаат во нешто не целосно проверено, бидејќи многу внимаваат на угледот. Но, од друга страна, знаеме дека пионерите имаат поголеми шанса да привлечат поголема публука. Иста е ситуацијата моментално и со Тик Ток“, вели Ивана Смиљанска, оперативен менаџер во Пикаса, компанија која што се занимава со прибирање и анализа на податоци.

Приватна архива/Ивана Смиљанска, оперативна менаџерка во Пикаса

Пикаса преку својата онлајн платформа „Analytics.live“ во реално време следи повеќе од 1.300 медиуми и илјадници канали на социјалните медиуми во шесте држави од Западен Балкан (Македонија, Србија, Босна и Херцеговина, Црна Гора, Албанија и Косово). Платформата за аналитика, меѓу другото, ги прикажува присутноста и ефектите од тоа на платформите на социјалните медиуми, како „Facebook“, „Instagram“, „Twitter“, „YouTube“, „TikTok“ и „Telegram, броејќи ги сите видови активности и реакции (лајкови, споделувања и коментари).

Анализите на Пикаса покажуваат дека начинот на кој Тик Ток се користи од страна на компаниите е најчесто преку инфлуенсери т.е. правниот субјект не се изложува директно, туку ангажира физичко лице кое го промовира производот.

„Целта е јасна, бидејќи зборуваме за маркетинг и ПР тимови кои се професионалци и трагаат по нови начини, за да ја задржат и прошират публиката со актуелни трендови. Процентуално, далеку под 1 отсто од компаниите имаат профили на Тик Ток, а нив ги следат помалку 9 проценти од вкупната публиката, или фирмите присутни на Тик Ток имаат помалку од 10.000 следбеници“, вели Смиљанска образложувајќи ги анализите за присуство на македонските компании на Тик Ток платформата.

Bloomberg Mercury

„Во Македонија само неколку компании имаат Тик Ток и ниту една не го користи (барем не како што треба)“, вели Мери Шешо Најденовска од агенцијата за дигитален маркетинг Пиксел. Според неа, Тик Ток е социјална мрежа со огромен потенцијал кој, за жал, сè уште не е целосно (или воопшто) искористен од страна на македонските компании.

Ако се земат предвид најпопуларните три компании присутни на Тик Ток и трите најпопуларни приватни профили од сите шест држави од Западен Балкан и ако се пресмета просечна вредност од тие податоци, тогаш анализата на Пикаса покажува дека компаниите ги следат само 2 проценти од вкупниот број корисници, додека најпопуларните приватни профили ги следат 98 проценти од корисниците на Тик Ток.

Извор: Пикаса

Анализата на Пикаса, спроведена во последните шест месеци, односно за периодот од април до септември, покажува дека објавите на Топ 3 најпопуларните компании во земјите од Западен Балкан допреле до 9 проценти од ТикТок популацијата, додека објавите на најславните физички лица се прегледани од десет пати повеќе корисници, или 91 отсто од вкупниот број.

Разликата во користењето на оваа социјална платформа се гледа и преку активностите на физичките лица и на фирмите. Највлијателните приватни профили во просек на месечно ниво имаат по 24 објави, што ги прави значајно активни, додека најпопуларните компании во просек имаат по 8 објави месечно. Но, просекот најмногу го креваат компаниите од Србија, кои се значајно поактивни на ТикТок, споредено со регионот. Додека, фирмите од Македонија се далеку под просекот. Тие објвуваат од 2 до 4 објави во месецот, или тоа би значело дека имаат по една објава на недела до две.

Кои компании користат Тик Ток во Македонија?

„Најчесто Тик Ток имаат медиумите, компании од комуникациската индустрија и моловите. И тоа е генерална слика за целиот регион. Публиката на Тик Ток е најчесто млада и тие компании што се таму се свесни и го користат моментот да создадат меморија за својот бренд и да ги жнеат резултатите од тоа подоцна“, вели директорката на Пикаса, Ивана Смиљанска.

Познавачите на пазарот на дигитален маркетинг сметаат дека фирмите прво треба да се едуцираат како да ја користат Тик Ток платформата за нивна промоција, каква содржина треба да креираат и како да направат алгоритмот да работи во нивна корист.

 

Bloomberg

„Од моето искуство, Тик Ток на почетокот имаше еден залет, наплив на еднократни кампањи од страна на брендовите. Тука трката повеќе беше кој ќе се позиционира прв таму, која компанија ќе се пофали дека прва лансирала кампања на Тик Ток. Меѓутоа тоа беше тоа. Наместо да се користи како уште една одлична социјална мрежа за креирање контент, повеќе беше да се направи ПР од целото присуство на Тик Ток“, вели менаџерката на Пиксел, Шешо Најденовска.

Од маркетинг агенцијата велат дека на почетокот од македонското тиктокерство имаше една доста успешна кампања, што ги следеше светските стандарди на своевремено популарниот предизвик со танцување и која ги „штиклираше сите полиња“ што треба да ги има една успешна кампања на Тик Ток. Тоа се трендинг тема (во случајот „Dance off Challenge“), видео материјал снимен наменски за оваа социјална мрежа, инволвирани ликови кои се “стручни“ на темата и популарни помеѓу таргет групата, инфлуенсери за да го зголемат досегот и вредна и привлечна награда како мотивација.

„Но, тука заврши сè. Немаше продолжување на приказната, немаше искористување на моментумот. Немаше дополнителен “push” кој ќе те забетонира помеѓу Тик Ток заедницата“, вели менаџерката на Пиксел.

Малиот дел македонски компании, присутни на Тик Ток, најчесто го прават тоа преку инфлуенсери

Следниот бран, оној „подостапен“ за македонските компании, беше преку инфлуенсери помеѓу Тик Ток заедницата.

„Инфлуенсерите на оваа социјална мрежа лесно се издвоија, бидејќи треба да бидеш добар видео „content creator“ за да добиеш органски досег и алгоритмот да те „исфрлува“ што почесто. На почетокот тие го „сркнаа“ медот од македонските компании. Би рекла дека и тие полека замреа, наместо да се намножуваат“, вели Мери Шешо Најденовска од Пиксел.

Bloomberg

Бумот оваа социјална мрежа го имаше можеби најмногу во екот на пандемијата и периодите кога повеќе време поминувавме дома, а со тоа и на нашите мобилни телефони. Луѓето имаа повеќе време за „губење“.

„Но, тоа беа „мрачни времиња“ кога повеќе од македонските компании ги кратеа буџетите за маркетинг, времиња на смрзнати маркетинг инвестиции и маркетинг активности сведени на нула“, вели Најденовска.

Маркетинг и агенциите за анализа на подантоци со кои разговаравме, се сложни дека дигиталниот маркетинг е вистинска инвестиција, која бара храброст и решителност но, подоцна се исплатува.

Фејсбук и натаму најомилен меѓу македонските компании за маркетинг и промотивни цели

Кај нас сè уште води традиционалната социјална мрежа „Facebook“. Тоа го потврдуваат и анализите на Пикаса. Тука е и „Instagram“, мрежата која сè повеќе добива на сила, особено поради можноста за вклучување на инфлуенсер маркетинот.

Bloomberg

Од агенцијата Пиксел образложуваат дека „Meta Business Manager“ на овие две социјални мрежи има толку голем потенцијал за креирање кампањи и промоции доколку се користи правилно, што може директно да даде увид на кого, колку и како треба да му се обратат компаниите за да ја пренесат пораката или да го продадат производот“.

Од друга страна, „LinkedIn“ во последните неколку години добива сè поголема популарност, како за промоција на компаниите, така и за промоција на самите корисници.

Bloomberg Mercury

„Личниот брендинг стана тренд кај „обичните“ LinkedIn корисници, а „Employer branding“ полека почнува да биде баран како услуга од македонските компании.

Софтверските компании го наложија ова како потреба. Тие беа првите клиенти за кои почнавме да работиме Employer branding, за понатаму да добиеме интерес од банкарските и производните индустрии“, вели менаџерката на Пиксел.

Ова кај нас е релативно нова појава, која допрва се очекува да се распространи меѓу корисниците. Дел од маркетинг агенциите веќе го нудат ова како услуга.

Во моментов нема коментари за веста. Биди прв да коментира...

Остави коментар