Каматните стапки ќе мируваат до следната година, Народната банка на последниот состанок за годинава одлучи да ги задржи на исто ниво. Во првата половина од 2024 година високи се очекувањата дека по циклусот зголемувања и задржување на ниво од 6,30 отсто, каматните стапки ќе бидат намалени.
Добро утро! Ова се петте вести што треба да ги знаете на почетокот од денот.
До изборите струјата нема значително да поскапи
Годинава побарувачката на електрична енергија беше намалена, што се должи главно на забавената економска активност, но за следната година се очекува раст на побарувачката, што ќе влијае цените да останат повисоки, напишаа аналитичарите на „Блумберг Адрија“ во својата анализа за очекувањата за 2024 година на пазарите на суровини.
Во земјите од регионот Адрија, цените на струјата следната година ќе имаат растечки тренд, велат нашите аналитичари, што ќе претставува постојан притисок врз потрошувачите и ќе резултира со намалување на нивната куповна моќ. Но, од друга страна, цените на струјата во регионот во голема мера се субвенционираат од страна на владите, што значи дека товарот врз потрошувачите и врз енергетските компании ќе биде олеснет.
Странски инвеститори во трка за ќар од македонското сонце
Турската групација „Гуриш“ преку својата македонска фирма „ГРС солар“ купува удел и стекнува единствена контрола над друштво за производство на електрична енергија, трговија и услуги „МИТ солар“, кое е основано за изградба на фотоволтаичен/соларен проект во општината Демир Капија, со номинална моќност од 24,84 MWp до околу 65 MWp. Ова е уште една од низата странски компании што во изминатиов период купуваат македонски фирми што се во фаза на реализација на проекти за изградба на фотонапонски електроцентрали или таканаречени сончеви електроцентрали.
Енергетската криза и енормното поскапување на струјата предизвикаа 2022 година да стане рекордна по инвестиции во изградба на капацитети за производство на струја од обновливи извори на енергија во Македонија.
Готови се законските измени: Кој ќе ја чува струјата од обновливи извори?
Рекордните цени на електричната енергија во 2022 година придонесоа годинава да се случи бум во производството на струја од обновливи извори. Во Македонија заклучно со ноември 2023 година инсталираниот капацитет во обновливи извори се зголеми за 150 отсто споредено со претходната година, покажуваат последните податоци на Регулаторната комисија за енергетика. Или, до минатиот месец РКЕ издала лиценци со вкупна инсталирана моќност од 379,3 мегавати.
Следниот чекор е поставување системи за складирање струја. Тоа од следната година ќе биде и законски регулирано затоа што измените во Законот за енергетика и новиот закон за обновливи извори на енергија веќе се во процедура. Двата закона се поставени на ЕНЕР и во тек е процесот на собирање забелешки за нив. Рокот за доставување забелешки по двата закона истекува на 4 јануари или за две недели.
Русија го зајакнува извозот на гориво, поткопувајќи дел од ветувањата на ОПЕК+
Испораките од Русија во просек изнесуваа 2,4 милиони барели дневно во четирите недели до 17 декември, според податоците што „Блумберг“ ги собра од аналитичката компанија „Вортекс“ (Vortexa Ltd). Тоа е најголема сума од средината на септември. Нафтениот пазар внимателно го следи рускиот извоз за да го измери обемот на производството откако Москва престана да објавува официјални податоци за производството.
На последниот состанок на Организацијата на земјите извознички на нафта и нејзините сојузници, нацијата вети дека ќе ги продлабочи намалувањата на извозот на сурова нафта и нафтени деривати во првиот квартал од следната година. Протоците на руската сурова нафта се зголемија на околу 3,28 милиони барели дневно во четирите недели до 17 декември.
Ракетата „Блу ориџин“ на Безос повторно полета во вселената
Ракетата „Њу шепард“ на „Блу ориџин“, американска компанија основана од милијардерот Џеф Безос, успешно полета од Тексас, означувајќи го нејзиното враќање во вселената повеќе од една година по несреќата. Ова враќање во вселената треба да овозможи континуирани операции на вселенски туризам за „Блу ориџин“, кој веќе однесе 31 богат истражувач на едноминутно патување над последната граница, вклучувајќи го и самиот Џеф Безос.
Несреќата што се случи во септември 2022 година резултираше со откажување на погонската етапа на ракетата и во тој момент ракетата не превезуваше патници. Истрагата ја отвори американскиот регулатор за воздухопловство (ФАА), кој во септември заклучи дека несреќата била предизвикана од „повисока работна температура на моторот од очекуваната“.
.webp){kind=icon}
