.webp){kind=icon}
Народната банка денеска соопшти дека Комитетот за оперативна монетарна политика одлучи каматните стапки да останат непроменети, во услови на значително забавување на инфлацијата и поволен девизен пазар, но и при сè уште присутни ризици.
„Со тоа, каматната стапка на благајничките записи останува на нивото од 6,30 отсто, со истовремено задржување на каматните стапки на депозитите прекуноќ и на седум дена на нивоата од 4,20 отсто и 4,25 отсто, соодветно. Понудата на благајнички записи на редовната аукција е непроменета и изнесува 10 милијарди денари“, се наведува во соопштението од НБРМ.
Домашната инфлација и натаму забавува и се сведе на 3,1 отсто на годишно ниво во ноември 2023 година. Овие остварувања го одразуваат значителното намалување на притисокот од прехранбената и енергетската ценовна компонента, како и намалените ценовни притисоци од помалку променливите категории, во согласност и со преземените монетарни мерки. Притоа, годишната стапка на инфлација кај нас позначително забави во споредба со еврозоната, со што разликата во инфлацијата е незначителна.
Сепак, просечната стапка на инфлација и натаму е на релативно високо ниво во споредба со историскиот просек. Ризиците во однос на идната динамика на цените и натаму постојат, за што покрај неизвесноста од движењето на цените на светските берзи, придонесуваат и одредени домашни фактори. Оттука, потребна е натамошна претпазливост, вклучувајќи и во однос на политиките што дејствуваат врз побарувачката на економијата.
„Состојбата на девизниот пазар е стабилна и движењата се поволни. Нивото на девизните резерви на крајот на ноември изнесува 3.963,7 милиони евра, што, според меѓународните стандарди и показателите што се следат, е соодветно ниво за одржување на стабилноста на курсот на домашната валута“, велат од НБРМ.
Народна банка
Реалниот раст на БДП во третиот квартал од 2023 година изнесува 1,2 отсто на годишна основа (по растот од 1,1 отсто во претходниот квартал) и е во согласност со растот проектиран за овој квартал според октомврискиот циклус на проекции. Анализирано по компоненти, растот произлегува од нето-извозот, дополнет со натамошниот раст на личната потрошувачка. Со оглед на ограничениот број расположливи податоци, сè уште е рано за поцелосни согледувања за економската активност за четвртото тримесечје од 2023 година. Засега, податоците за октомври 2023 година покажуваат солидни позитивни движења кај индустриското производство, како и забавување на реалниот пад кај прометот во вкупната трговија.
„Во монетарниот сектор, според првичните податоци заклучно со ноември 2023 година, депозитите и кредитите и натаму растат со темпо што засега е во рамките на очекувањата за последниот квартал од годината“, нагласуваат од НБРМ.
Од Народната банка нагласуваат дека централната банка е подготвена да ги употреби сите неопходни инструменти и да презема соодветни мерки со кои ќе се придонесе за задржување на стабилноста на девизниот курс, стабилизирање на инфлациските очекувања и за ценовна стабилност на среден рок.
