Странски инвеститори во трка за ќар од македонското сонце

Турската групација „Гуриш“ преку својата македонска фирма „ГРС Солар“ купува удел и стекнува единствена контрола над друштво за производство на електрична енергија, трговија и услуги „МИТ Солар“ кое е основано со цел за изградба на фотоволтаичен/соларен проект во општина Демир Капија со номинална моќност од 24.84 MWp до околу 65 MWp. 

Според известувањето за оваа концентрација доставено до Комисијата за заштита на конуренцијата, „Гуриш“ е групација која е активна во Турција и во Средна, Источна, Блиска и Централна Азија, Комонвелтот на независни држави и во Северна Африка, и има изградено проекти по принцип „клуч на рака“ речиси во секоја област во градежната индустрија. Групацијата досега работела на автопати, мостови, вијадукти, железници, тунели, метро, поморски пристаништа и аеродроми, брани, системи за наводнување и прочистување на водата, пречистителни станици за вода и отпадни води, термоелектрани, хидроелектрични централи, геотермални централи, ветерни електрани и други проекти.

Ова е уште една од низата странски компании кои во изминатиов период купуваат македонски фирми кои се во фаза на реализација на проекти за изградба на фотонапонски електроцентрали или таканаречени сончеви електрани.

Словенечки и израелски компании веќе влегоа на македонскиот пазар

„Блумберг Адрија“ неодамна пишуваше дека македонска компанија „КАВ Сонце“ беше купена од „ГЕН-И Сонце“. „Кав Сонце“ е во фаза на развој на фотонапонска електроцентрала во близина на Кавадарци. „Ген-И Сонце“ е подружница на словенечката групација „Ген-И“ која преку своите зависни друштва е активна на пазарите на Словенија, Австрија, Италија, Бугарија, Србија, Босна и Херцеговина, Хрватска, Македонија, Албанија, Грција, Турција, Украина и Грузија. Во Македонија, групацијата се занимава со производство, продажба и трговија со енергија.

Претходно, инвеститори од Израел преку нивната унгарска компанија „Биг Енергиа Холдингс Кфт.“ ја купија македонската фирма „Дам Енерџи“, чија регистрирана приоритетна дејност е производство на електрична енергија. „Биг Енергиа Холдингс Кфт.“ е во целосна сопственост на „Биг Мега Обновлива Енергија“ (БИГ), енергетско друштво кое е независен производител на енергија и работи во Израел, Романија, Босна и Херцеговина, Србија и Македонија. Ова друштво, пак, функционира како подружница на компаниите „Биг шопинг центерс“ и на „Мега“ кои котираат на берзата во Тел Авив.

„Блумберг Адрија“ веќе пишуваше дека БИГ преку унгарската компанија почна наголемо да инвестира во македонскиот сектор на електрична енергија преку купување на удели односно цели друштва и преку развивање на сопствени проекти. Имено, „Биг Енергиа Холдингс Кфт.“ веќе има регистрирано присуство во Мaкедонија преку друштвото за производство на електрична енергија „Биг Мега Македонија – Штип Солар Уан“, друштвото за производство, трговија и услуги „Биг Мега Менаџмент“, кое како основна дејност има регистрирано управувачки дејности, како и преку фирмите за производство на струја „Бака енерџи“, „Чашица Солар“ и „Скај Солар“. 

Кризата предизвика бум во изградба на сончеви електрани

Енергетската криза и енормното поскапување на струјата предизвикаа 2022 година да стане рекордна по инвестиции во изградба на капацитети за производство на струја од обновливи извори на енергија во Македонија. Лани беа изградени вкупно 267 нови електроцентрали кои користат обновливи извори на енергија кои придонесоа производствениот капацитет да се зголеми за 18 проценти или во апсолутен износ за 144,4 MW. Во бројката на новоизградени електроцентрали фотонапонските електроцентрали доминираат со 254 електроцентрали со инсталирана моќност од 99,2 MW. 

Со тоа, вкупниот број капацитети за производство на електрична енергија од обновливи извори во Македонија заклучно со минатата година изнесуваше 616 електроцентрали со инсталирана моќност од 946 MW. Во 2022 година инсталираната моќност на електроцентралите од обновливи извори на енергија учествува во вкупниот производствен капацитет со 41,5 проценти, додека во вкупното производство учествуваат со 29 проценти.

 

Во моментов нема коментари за веста. Биди прв да коментира...

Остави коментар