.webp){kind=icon}
Глобалното затоплување моментално е еден од најголемите предизвици на човештвото, а Македонија и останатите земји од регионот Адрија се загреваат многу повеќе и побрзо од просекот на остатокот од светот. Тоа има своја цена, а таа не е мала. Економијата на регионот Адриjа ја пржат климатските промени, а одговорот ќе чини многу пари. Сите ќе платиме за тоа.
Добро утро, подолу петте вести што ги издвоивме за почеток на денот:
Преглед на берзите: по недела на рекорди - нови рекорди
Минатата недела ја одбележаа главно кинеските мерки за поттик на економскиот раст. Кинеските пазари ја забележаа својата најдобра недела во последните 16 години, при што индексот CSI 300 на копното се зголеми за повеќе од 15 отсто за една недела. Зелениот бран од азиските пазари потоа се прелеа и на американските и европските индекси.
Ајде прво да погледнеме на Исток. На почетокот на неделата Народната банка на Кина изненади со сеопфатниот пакет монетарни стимулативни мерки со коишто Кина амбициозно се обидува да ја избегне најголемата криза во последната деценија. Кинеските индекси CSI 300, Shanghai Composite и Hang Seng се зголемија за повеќе од четири отсто дента по објавата на одлуката, што е највисоко ниво од јули 2020 година. До крајот на неделата индексот Hang Seng доби скоро 13 проценти, а CSI 300 се покачи за 15 проценти на највисоко ниво годинава.
Можно е „сериозно рели“ на кинеските акции
Инвеститорите треба да ги прошират неодамнешните добивки од кинеските акции и јуанот, кои беа поттикнати од стимулациите, како и од падот на обврзниците на земјата, според Стивен Џен од „Еуризон СЛЈ Капитал“ (Eurizon SLJ Capital). „Инвеститорите имаат премалку средства во сè што е кинеско, а кинеските акции се крајно потценети, така што сериозно рели е сосема возможно“, рече Џен, главен извршен директор на компанијата со седиште во Лондон, во извештај до клиентите во петокот.
Џен, кој минатиот месец рече дека кинеските компании може да бидат во искушение да продадат куп средства од еден трилион деноминирани во долари додека САД ги намалуваат каматните стапки, ги следи инвеститорите, вклучително и милијардерот Дејвид Тепер, во изразувањето очекувања за биковски раст во Кина, откако нејзината влада воведе огромни стимулативни мерки.
Ќе учиме дигитално земјоделство, а има ли каде да го примениме?
Од вештачка интелигенција (ВИ) и роботика до интернет на нештата (IoT) и 5Г. Најновите технологии може да понудат непроценлива поддршка за земјоделците и агробизнисите. Трактори што сами ја обработуваат земјоделската површина, дронови што ги прскаат насадите, машини што самостојно берат и селектираат плодови, па дури и ги складираат соодветно. Благодарение на технолошкиот развој тоа стана новата реалност во земјоделството. Ама само за некого. За нас, на пример, изгледа бајковито.
Но иако бавно, сепак, работите се поместуваат. А од каде ако не од почеток? Имено, од академската 2024/2025 година, за првпат во 77 години постоење на Факултет за земјоделски науки и храна во Скопје (ФЗНХ) се акредитира нова студиска програма, и тоа интердисциплинарни студии по дигитално земјоделство, како единствена од ваков вид во земјава.
Коцкањето со „Мета“ на Закерберг му донесе богатство од 201 милијарди долари
Облогот на Марк Закерберг за метаверс првично изгледаше како колосална грешка, бришејќи повеќе од 100 милијарди долари од неговата нето вредност. Но, сега тоа на големо се исплати. Поттикната од рекордно високата цена на акцијата на „Мета Платформс“, нето вредноста на Закерберг за помалку од две години се искачи за речиси шест пати на 201 милијарда долари, со што тој првпат ја надмина границата од 200 милијарди долари, според индексот на милијардери на „Блумберг“. Тој се пресели на четвртото место на листата на 500 најбогати луѓе во светот зад Елон Маск, Џеф Безос и Бернард Арно.
Додека другите технолошки титани направија големи скокови во нето вредноста оваа година - главниот извршен директор на „Енвидија“, Јенсен Хуанг, на пример, го удвои своето богатство на 106,2 милијарди долари - ниту еден не порасна толку колку Закерберг. Тој додаде 73,4 милијарди долари на своето богатство од 1 јануари благодарение на неговиот удел од 13 проценти во „Мета“. Акцијата се затвори на историски максимум во средата и се зголеми за 60 проценти оваа година.
Можат ли парфемите да ја спасат индустријата на луксузот?
Додека продажбата на повеќето луксузни стоки драстично забави, побарувачката за парфеми и тоалетна вода останува силна. Парфемите се најбрзо растечката категорија на луксузна козметика оваа година, со раст на приходите од 12 проценти во првата половина од годината во споредба со истиот период во 2023 година, според извештајот за индустријата за убавина на „Циркана“ (Circana).
Продажбата расте на двата краја на ценовниот спектар во луксузниот сегмент: парфемите и тоалетната вода продолжуваат да даваат најголем придонес во растот, и покрај зголемувањето на цените. Производите со пониски цени, како што се мини верзии и миризливи спрејови за тело, исто така придонесуваат за успехот на категоријата. Всушност, по пандемијата, продажбата на мини пакети и пакети за патување порасна двојно побрзо од вкупната категорија парфеми.
