САД и Иран размениле оган во Персискиот Залив во ново разгорување на насилството што ги вклучи и Обединетите Арапски Емирати. Судбината на четиринеделното примирје е под знак прашалник, акциите паѓаат, цената на нафтата расте.
Добро утро, ова се петте вести што се важни за почеток на денот.
И Македонија ќе има субвенции за електрични возила: До 2030 и зелен транспорт
Преку финансиски стимулации, државата ќе го промовира користењето електрични возила и велосипеди. Во Националниот план за енергија клима кој се однесува на периодот до 2030 година, а беше усвоен на почетокот на април, се наведува дека финансиските стимулации се клучни за намалување на загадувањето на животната средина што произлегува од транспортниот сектор.
Преку различни законски измени треба да се овозможи финансиска поддршка за да се зголеми уделот на електрични возила од една страна, а од друга - да се зголеми цената на горивата со високи емисии за тие да не бидат конкурентни, стои во планот.
Уриваме рекорди во изградба на сончеви електрани, ама без фосилни горива би немале струја
Бројот на фотонапонски електрани (сончеви електрани) во Македонија лани достигнал 1.458, што е зголемување за 111 сончеви електрани во однос на 2024 година, покажуваат податоците на Регулаторната комисија за енергетика.
Вкупниот инсталиран капацитет на сите видови електроцентралите во 2025 година изнесувал 3.162,5 MW, што е за 178,6 MW повеќе од инсталираниот капацитет во 2024 година. Во вкупниот инсталиран капацитет во 2025 година термоелектроцентралите имаат најголемо учество со 32,70 проценти, потоа следуваат фотонапонските електроцентрали со 30,44 проценти, хидроелектроцентралите со 22,76 проценти, комбинираните постројки за производство на електрична и топлинска енергија со 9,09 проценти и сите преостанати со 5,01 проценти. Eлектроцентралите коишто користат обновливи извори на енергија доминираат во вкупниот инсталиран капацитет, односно нивното учество во 2025 година изнесува 58,22 проценти, што претставува зголемување од 2,5 проценти споредено со 2024 година.
Зошто акциите на одбранбените компании паѓаат и покрај војната и зголемената побарувачка
Акциите од секторот на одбранбената индустрија во последните години беа „жешка“ можност за инвестирање. Војната во Украина го промени начинот на кој Европа размислува за безбедноста, државите започнаа масовна набавка на вооружување, а компании како „БАЕ Системс“ (BAE Systems), „Рајнметал“ (Rheinmetall AG) и „Сааб“ (Saab AB) добија можност да обезбедат побарувачка за долг временски период, што за инвеститорите е најважниот параметар за идниот раст на компаниите.
Затоа денешната слика на прв поглед изгледа целосно нелогично. Војната на Блискиот Исток ескалира, а крајот не е ни на повидок, геополитичката неизвесност е исклучително висока, државите повторно зборуваат за безбедност, а акциите на одбранбените компании паѓаат. Ако светот е поопасен од кога било, зарем не би требало компаниите што продаваат оружје да бидат меѓу најголемите добитници?
Финансиски левериџ - Пандорина кутија за малите инвеститори
Финансиската потпора (финансиски левериџ/лост - од англиски: leverage) е еден од оние поими што на прв поглед звучат комплицирано, но самата идеја е всушност многу едноставна. Станува збор за контролирање многу поголема инвестиција со релативно мал износ на сопствен капитал. Со други зборови, позајмувате средства за да ја зголемите вашата изложеност на пазарот.
Тоа е слично како купување стан со помош на кредит. Не мора да го имате целиот износ за да ја купите недвижноста. Доволно е да инвестирате дел од вашите сопствени пари, додека остатокот го финансира банката. На финансиските пазари принципот е ист, само наместо недвижен имот, се тргува со акции, валути, стоки или криптовалути. Финансискиот левериџ може значително да ја зголеми потенцијалната заработка, но и потенцијалните загуби. Токму затоа е алатка што бара разбирање, дисциплина и претпазливост. Во рацете на искусен инвеститор, таа може да биде многу корисна, но за почетници е еден од најризичните инструменти на пазарот.
Берзански преглед: Акциите паѓаат, нафтата расте поради нови тензии на Блискиот Исток
Растот на цената на нафтата ги намали акциите и обврзниците поради загриженост дека обновените ирански напади би можеле да ја ескалираат тензијата на Блискиот Исток, задржувајќи ги енергетските трошоци високи и поттикнувајќи ризици од инфлација.
Акциите паднаа од рекордните висини додека брент суровата нафта скокна на околу 115 долари, откако Иран ги нападна Обединетите Арапски Емирати за првпат по речиси еден месец, а Техеран предупреди дека ја зајакнува контролата врз Ормускиот Теснец. Со цените на нафтата блиску до четиригодишен врв, приносите на американските државни обврзници се зголемија.
.webp){kind=icon}
