Народната банка на последната седница донесе одлука за задржување на основната каматна стапка на нивото од четири проценти. „Одлуката за монетарната политика беше донесена во услови на исклучително зголемена глобална непредвидливост и потреба од дополнителни информации за поцелосно согледување на ефектите врз домашната економија“, наведуваат од Народната банка.
Во меѓувреме, златото порасна на светските берзи по знаците дека купувачите стапнале на пазарот по разгорувањето на непријателствата на Блискиот Исток, што ги намали цените за два процента во понеделникот.
Американската војска соопшти дека се спротивставила на нападите од Иран додека го олеснувала преминувањето на два брода под американско знаме низ Ормускиот Теснец. Насилството го потресе примирјето кое во голема мера се почитува од стапувањето во сила на 8 април и ги зголеми ризиците од инфлација и зголемување на стапките. Цените на нафтата скокнаа по извештаите, додека приносите од 30-годишни државни обврзници се искачија на највисоко ниво од јули, бидејќи трговците ги зголемија облозите дека Федералните резерви ќе мора да ги зголемат каматните стапки за да ја ограничат инфлацијата.
Добро утро, ви пишува Игор Петровски од дигиталната редакција на „Блумберг Адрија“. Ова се петте вести што ги издвоивме за почеток на денот:
Нова фискална стратегија на Владата: Повисока инфлација, понизок раст на БДП
Владата ги намалува прогнозите за растот на македонскиот бруто домашен производ, а ги зголемува проекциите за инфлацијата во новата фискална стратегија за периодот 2027-2031 година. Според основното макроекономско сценарио, се очекува дека растот на БДП во 2026 година ќе биде 3,5 проценти, наместо 3,8 проценти како што беше проекцијата во условно кажано старата ревидирана фискална стратегија за периодот 2026-2030 година.
Просечната стапка на инфлација се очекува годинава да изнесува 4,5 проценти, што е речиси двојно повеќе отколку проектираните 2,5 проценти во старата фискална стратегија. Во Владата очекуваат инвестицискиот импулс од реализацијата на крупните инфраструктурни проекти значително да го амортизира ефектот од ограничувачките фактори кои произлегуваат од надворешните шокови и да бидат главен двигател на економската активност во 2026 година, при очекуван реален пораст од 7,2 проценти на реална основа.
Капиталните инвестиции со добра реализација во првиот квартал, ќе има ли пари за до крајот на годината?
Високо ниво на реализација на капиталните инвестиции за првите четири месеци пред неколку дена објави министерот за транспорт и врски Александар Николоски во еден домашен поткаст. Претходно, во март месец, од Министерството за финансии објавија дека во првите два месеци од предвидените 40,1 милијарди денари (околу 650 милиони евра) за 2026 за капитални проекти, реализирани се 8,1 милијарди денари, или 20,12 отсто.
На оваа динамика на реализирање на капиталните инвестиции не сме баш навикнати изминативе години, па и децении. На хартија со години македонските влади ветуваат развој на државата со капиталните инвестиции, но во пракса ретко кога годината ја завршуваат со максимум реализација од она што е планирано со буџетот.
ЕУ му вети на Трамп дека ќе го усвои трговскиот договор до јули
Европската унија сака главните делови од трговскиот договор со САД да бидат усвоени до јули, откако го притискаше Вашингтон да ги почитува претходните обврски преземени според договорот. Шефот за трговија на ЕУ, Марош Шефчович, му ја пренесе пораката на американскиот трговски претставник Џејмисон Грир за време на состанокот во вторник во Париз, според портпаролот на Европската комисија.
САД и ЕУ се на прагот на уште еден трговски судир откако претседателот Доналд Трамп се закани дека ќе воведе царини од 25 отсто за европските автомобили и камиони, обвинувајќи го блокот дека не ги почитува своите претходни обврски. Трамп е фрустриран што на ЕУ ѝ требаат месеци за формално да го ратификува трговскиот договор што двете страни првично го постигнаа минатиот јули. Но, ЕУ се правда дека едноставно поминува низ својот законодавен процес и има за цел да го одобри договорот во јуни.
Само неколку акции го креваат S&P 500, на Волстрит ги потсетува на дот-ком балонот
Забрзаниот раст на американските берзи кон нов историски максимум е поттикнат од толку малку акции што потсетува некои аналитичари на Волстрит на трката што доведе до дот-ком балонот своевремено.
Четири од последните пет рекордни дневни вредности за индексот S&P 500 се случија дури и кога оние акции што загубиле од вредноста беа побројни од добитниците. Во месец април, само 23 отсто од членките на S&P 500 го победија индексот, што стратезите на „Банката на Америка“ (BofA Global Research) велат дека е четвртото најниско месечно отчитување во базата на податоци на банката што датира од 1986 година.
Како „Гили“ успеа да го надмине големиот БЈД
Најжешката автомобилска приказна од Далечниот Исток не е веќе добропознатата надмоќ на кинеските брендови во дигитализацијата, туку жестокото глобално ривалство меѓу најголемото име во електричната мобилност, концернот БЈД, и сè поразновидниот „Гили“.
Како што лани БЈД по продажба ја симна од врвот американската „Тесла“, така сега на гигантот од Шенжен сè повеќе му дише во врат конкурентот од Хангџоу. „Гили“ ја заврши 2025 година со три милиони продадени автомобили, што е раст од 39 отсто во однос на претходната година, а неговата акција е во силен подем од почетокот на иранската војна.
.webp){kind=icon}
