text size
Американскиот претседател Доналд Трамп изјави дека во следните денови би можел повторно да одобри напади врз Иран, како дел од притисокот за постигнување договор за завршување на војната, иако претходно рече дека откажал веќе планиран американски напад.
„Се надевам дека нема да мораме да водиме војна, но можеби ќе мора да им зададеме уште еден силен удар“, изјави Трамп пред новинарите во вторникoт. На прашањето колку долго би чекал, одговори: „Два или три дена, можеби петок, сабота, недела. Можеби на почетокот на следната недела - ограничен период“.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Македонија има најбрзо растечка стартап средина во Јужна Европа
Македонија се најде на 70.место на листата од 100 земји рангирани според Глобалниот стартап екосистем индекс за 2026 година, што е подобрување за осум места во однос на претходната година. Во извештајот што од 2017 година наваму секоја година го подготвува Стартап Блинк (StartupBlink) се наведува дека Македонија годинава бележи раст од 75 проценти, што е највисок во Јужна Европа.
Станува збор за 6-то најголемо искачување на ранг-листата во глобалните Топ 100. Нашата земја, како и лани останува 7-ма на Балканот и 10-та во Јужна Европа.
„Македонија е рангирана повисоко во Индексот на деловна средина на иноватори (51-во место), што укажува дека постојат силни деловни услови за поддршка на брзорастечкиот стартап екосистем“, се посочува во извештајот.
Колку лесно излегуваат доверливите информации?
Вработен внесува договор во Чет ГПТ за да го „скрати“. Маркетинг тим користи „Копилот“ или друг четбот за побрзо да подготви кампања врз основа на информации добиени од клиент. Одговорен во сектор за човечки ресурси анализира биографии преку јавна платформа за вештачка интелигенција (ВИ).
Во многу компании ова веќе е секојдневие. Но, проблемот што сè повеќе го отвора бизнис секторот е дали фирмите воопшто имаат контрола врз тоа какви податоци завршуваат во системите на вештачка интелигенција и колку доверливи информации излегуваат надвор од корпоративните мрежи.
„Свесноста за потребата од интерни политики расте, но реалноста е дека технологијата се движи многу побрзо од способноста на компаниите да воспостават системи за контрола. Во дел од фирмите вработените веќе користат ВИ алатки во секојдневната работа, а правилата и процедурите допрва се подготвуваат“, вели Елена Петрушевска, директор на Извршната канцеларија на МАСИТ.
Kако „Беркшир“ го менува курсот без легендарниот Бафет?
Во првото тримесечје од 2026 година „Беркшир Хатавеј“ (Вerkshire Hathaway) доста го промени своето портфолио. Во период кога компанијата повеќе не ја води легендарниот инвеститор Ворен Бафет, бројот на вложувања е намален од 42 на 29, покажуваат јавно објавените податоци за портфолиото.
Најмногу внимание привлекоа неколкуте целосни излегувања од познати компании. „Беркшир“, меѓу другото, целосно го продаде уделот во „Амазон“, „Виза“, „Мастеркард“ и „Јунајтедхелт“ (UnitedHealth Group).
Од друга страна, „Беркшир“ отвори неколку нови позиции. Најголема меѓу нив е купувањето акции на авиокомпанијата „Делта ер“ (Delta Air Lines), вредно околу 2,65 милијарди долари. Вредноста на сите инвестиции на „Беркшир“ изнесува околу 263 милијарди долари.
Обврзниците низ целиот свет се под голем притисок
Обврзниците ширум светот трпат силен притисок, туркајќи ги трошоците за задолжување на највисоки нивоа во повеќе години, додека растат грижите поради инфлацијата поттикната од војната и сè поголемата државна потрошувачка.
Приносот на 30-годишните американски обврзници го достигна највисокото ниво од 2007 година, додека приносот на јапонските обврзници со иста рочност скокна на нивоа што не се забележани во 27-годишната историја на тој инструмент. Во Обединетото Кралство, приносот е највисок од 1998 година.
Кога сè ќе се собере, просечниот принос на десетгодишните обврзници на земјите од Г7, најразвиените економии, го достигна највисокото ниво од 2004 година, наведува Торстен Слок од „Аполо Глобал Менаџмент“.
Прочитајте го текстот кој подетално објаснува зошто инвеститорите продаваат државни обврзници.
НАТО размислува за интервенција во Ормускиот теснец
НАТО разговара за можноста да им помогне на бродовите да минуваат низ блокираниот Ормуски теснец доколку поморскиот пат не биде повторно отворен до почетокот на јули, според висок функционер во воената алијанса.
Идејата има поддршка од неколку членки на Северноатлантската алијанса, но сè уште ја нема потребната едногласна поддршка, изјави дипломат од една НАТО земја. Двајцата функционери зборуваа под услов на анонимност. Лидерите на НАТО земјите ќе се состанат во Анкара на 7-8 јули.
„Политичката насока доаѓа прва, а потоа следува формалното планирање“, изјави Алексус Гринкевич, врховен сојузнички командант на НАТО за Европа, кога беше прашан за можноста на прес-конференција во вторникот. „Дали размислувам за тоа? Апсолутно.“
Како да купите крипто?
Криптото повеќе не е резервирано само за експерти. Денес постојат неколку едноставни начини за пристап до пазарот. Еден од начините за купување крипто денес е преку финтек-сервиси базирани на блокчејн-технологија.
Дознајте како функционираат криптопазарите, блокчејнот и дигиталните средства преку Блумберг Адрија Крипто едукација. ДОЗНАЈТЕ ПОВЕЌЕ
.webp){kind=icon}
