Од Нова година компаниите ќе плаќаат повисоки надоместоци за експлоатација на природните ресурси. Со измените во тарифникот за утврдување на висината на надоместоците за издавање дозволи и концесии за вршење детални геолошки истражувања и концесии за експлоатација на минерални суровини, тие се зголемуваат до 100 отсто. Според надлежните, тоа значајно ќе ги зголеми приходите за државата, но и ќе се воведе ред во користењето на националните богатства.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
МБИ10 во транс: Внимателно со бикот, да не заигра мечката пред врата
Македонскиот берзански индекс ја завршува 2024 година со несомнено одличен резултат, раст од 65 проценти, со што МБИ10 ја достигна својата историски највисока вредност од над 10.000 поени, вторпат од 2007 година досега. Со тоа, Македонската берза е меѓу пазарите во светот со најголем раст годинава, надминувајќи ги со перформансите и најзначајните берзи, како оние во Њујорк, Франкфурт, Лондон, регионалните берзи итн. Сето ова, како што обично се случува на пазарите на капитал, е последица на комбинација од неколку фактори, вели извршниот директор на Македонската берза, Иван Штериев, во интервјуто за „Блумберг Адрија ТВ“.
„Подобрената макроекономска состојба, скротената инфлација, намалените каматни стапки, позитивните берзански движења глобално, кои имаат влијание и врз локалниот сентимент на инвеститорите, добрите резултати на котираните домашни компании и атрактивните дивиденди, особено во банкарскиот сектор, сето тоа придонесе МБИ10 да го повтори својот историски рекорден резултат, психолошката граница од 10.000 поени“, вели Штериев.
Прогноза 2025: Растот на македонскиот индекс ќе продолжи, но поумерено
Се покажа дека 2024 година беше речиси идеална за инвеститорите што се подготвени да преземат поголеми ризици, особено оние што инвестираат во акции. Општо земено, американскиот пазар испорача поврат од 23 проценти од почетокот на годината досега (SPX500), при што технолошкиот Nasdaq ги надмина перформансите со 29 проценти. Во Европа, сепак, пазарите се соочија со спротивставени ветрови поради слабата економија на Западна Европа и политичките пресврти во Германија и во Франција.
Зумирајќи го регионот Адрија, сликата е во голема мера многу добра. Македонскиот индекс МБИ10 предводеше со извонреден раст од 65 проценти од почетокот на годината досега, поттикнат од силните перформанси во банкарскиот, туристичкиот и градежниот сектор.Словенечките акции исто така го надминаа американскиот пазар, продолжувајќи ја својата траекторија на раст во 2024 година. Во Хрватска, индексот CRO10 се зголеми, поттикнат од зелената транзиција, при што „Кончар“ и „Кончар дистрибутивни и специјални трансформатори“ достигнаа рекордни нивоа.
Пет скијачки дестинации што се поевтини од најпопуларните, а исто толку престижни
Еве неколку добри вести за скијачите: климатскиот феномен Ла Ниња најавува обилен снег во Јужна и Северна Америка и пониски температури во Европа сезонава, што е вистинско олеснување во споредба со минатата година, кога падна малку снег. Што може да биде проблем? Скијачките центри очекуваат рекорден број посетители.
Сепак, можете да имате сѐ – фантастични патеки, одлични понуди и многу снег доколку изберете алтернативни дестинации во непосредна близина на некои од најпознатите скијачки центри во светот. Куршевел и блискиот Межев колку што се скапи толку се и исклучителни, но подобра понуда ве очекува на спротивната страна од скијачката област Евазион Мон Блан (Évasion Mont Blanc). Таму ќе го најдете скијалиште во местото Сен Никола де Верос и во него новиот хотел „Армансет“ (Armancette) со поволни цени.
Колку пари се потребни за да им се приклучите на најбогатите еден отсто во светот
Пробивањето во топ 1 отсто од најбогатите луѓе, во САД станува сè потешко. Сега се потребни најмалку 5,8 милиони долари за да ѝ се приклучите на најбогатата класа во најголемата економија во светот, што е речиси 15 отсто повеќе од пред околу 12 месеци, според истражувањето на „Најт Френк“ (Knight Frank).
Монако го задржува првото место за највисок праг на богатство во светот со 12,8 милиони долари, што е зголемување од 3,2 отсто од пред една година, додека во Луксембург и во Швајцарија се потребни повеќе од 8 милиони долари за да се достигне тој праг, според извештајот за богатство за 2024 година на брокерот за недвижности.Наодите нагласуваат како закрепнувањето на пазарите во САД и другите западни земји ја зголемува разликата помеѓу богатите и сиромашните држави.
Две третини од Македонците веќе купуваат онлајн
Речиси две третини или 63,5 проценти од македонските интернет-корисници нарачале/купиле стоки или услуги онлајн во последните 12 месеци, наспроти 53,5 проценти во истиот период во 2023 година, според податоците на Државниот завод за статистика. Од Асоцијацијата за електронска трговија на Македонија (АЕТМ) велат и дека се забележува пораст на направените онлајн купувања/нарачки за 10 процентни поени.
Македонските граѓани, како и во минатите години, најмногу купувале облека (вклучувајќи и спортска облека), чевли или додатоци (на пример чанти и накит). Она што е позитивно и се забележува е порастот на онлајн нарачките кај повеќе категории, а најголем пораст има кај категоријата компјутери, таблети, мобилни телефони или додатоци, при што лани се изјасниле 6,2 проценти од купувачите дека купувале такви производи, а годинава двојно повеќе, 12,8 проценти.
.webp){kind=icon}
