Европската централна банка ги остави каматните стапки непроменети по четврти пат, додека инфлацијата се движи околу целната вредност, а еврозоната се справува со глобалните шокови. Депозитната стапка беше задржана на 2 проценти по вчерашниот состанок - како што предвидоа сите аналитичари во анкетата на „Блумберг“. Креаторите на политиките продолжија да не даваат насоки за идните чекори, нагласувајќи дека ќе одлучуваат состанок по состанок врз основа на новите податоци.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Дали иселениците купуваат - расте продажбата на станови во помалите градови
Недвижностите во Скопје уриваат рекорди според цените, но не и според бројот на продажби. Според полугодишниот извештај на Агенцијата за катастар, во текот на првите шест месеци од годинава, споредено со периодот јануари-јуни лани, најголем раст на бројот на продадени станови меѓу скопските општини има во Центар, од 25 отсто.
За разлика од Скопје, во помалите градови продажбата расте многу побрзо. А најголем број станови се продадени во општините со најголем број иселеници. На врвот на листата е Тетово, каде што во првата половина од оваа година продажбата на станови се зголемила за 60 отсто во однос на истиот период лани, следуваат Велес, Охрид, Струмица и Штип.
Пресметавме колку губи македонскиот буџет поради рамниот данок
Со стапка од близу 56 отсто, Данска е лидер во Европа по висината на данокот на персонален доход. Најниските стапки ги имаат Бугарија и Романија, 10 отсто. Просечната највисока стапка на персонален данок на доход за 2025 година кај европските земји членки на ОЕЦД изнесува 42,8 проценти.
Во повеќето земји во Европа во сила е прогресивно оданочување, односно тој што заработува повеќе плаќа повеќе. Највисоката законска стапка на персонален данок се применува на делот од приходот што спаѓа во највисоката даночна класа. На пример, ако една земја има пет даночни класи и највисоката стапка од 50 проценти се применува на праг од над еден милион евра, тогаш секое дополнително евро над милион би се оданочувало со 50 проценти.
Како вештачката интелигенција може да ја подобри продуктивноста?
Успешна приказна се создава преку добро управување со ресурсите затоа што не е доволно тие само да постојат, вели Златко Еделински, бизнис-советник од „Koнтим агроконсалтинг“ (Kontim Agroconsulting), кој беше дел од панел-дискусијата „Продуктивност – замки и решенија“ што неодамна ја организираше „Блумберг Адрија“.
„Во земјоделскиот сектор, современото производство денес не може да се замисли без модернизација на производството, а тоа значи инвестиции во сите сегменти од примарното производство, примена на модерни агротехнички мерки, модерна механизација и опрема и, секако, во последно време сѐ поголема дигитализација односно алатки што се користат за напредно земјоделско производство – тоа се дронови, паметни системи за наводнување, сето тоа влијае на приносите, кои понатаму влијаат на ефективноста, па на профитабилноста и на крајот, главната работа, на продуктивноста на таа компанија“, вели Еделински.
Инвестиции во човечкиот капитал за развој на малите бизниси
Малите фирми во Македонија имаат лимитирани ресурси и нивните сопственици гледаат што помал број луѓе да извршуваат повеќе функции, иако тие не се квалификувани, немаат знаење и вештини за вршење на сите тие функции, посочи Никола Деребанов, бизнис-советник од „Вириди“ (Viridi), кој беше дел од панел – дискусијата „Предизвици и најдобри практики во финансискиот менаџмент за мали и средни претпријатија“, што неодамна ја организираше „Блумберг Адрија“.
„Не се инвестира во софтверски решенија што би им помогнале за полесно да ги анализираат податоците, а некои од нив воопшто ги немаат потребните податоци. За да има модернизација, потребни се планови во зависност од големината на фирмата“, рече Деребанов.
Германија лансира фонд за привлекување 100 милијарди евра приватен капитал
Германската влада лансира нов инвестициски фонд наменет за привлекување повеќе десетици милијарди евра приватен капитал за енергетска инфраструктура, суровини, одбрана и стартапи. Таканаречениот „Дојчландфондс“ (Deutschlandfonds) ќе собере 30 милијарди евра јавни средства и гаранции, од кои само околу една третина ќе бидат свежи пари, а остатокот ќе се повлече од постојните државни програми за поддршка, според лица запознаени со плановите.
Структурата има цел да мобилизира околу 100 милијарди евра приватни инвестиции во земјата. Иницијативата е дел од напорите на канцеларот Фридрих Мерц за оживување на нестабилната економија на Германија, истовремено создавајќи стратешки инструмент за критичните сектори, вклучувајќи ги енергетиката и одбраната, како и за промовирање на иновациите.
.webp){kind=icon}
