Дали иселениците купуваат - расте продажбата на станови во помалите градови

Недвижностите во Скопје уриваат рекорди според цените, но не и според бројот на продажби. Според полугодишниот извештај на Агенцијата за катастар, во текот на првите шест месеци од годинава, споредено со периодот јануари-јуни лани, најголем раст на бројот на продадени станови меѓу скопските општини има во Центар, од 25 отсто.

За разлика од Скопје, во помалите градови продажбата расте многу побрзо. А најголем број станови се продадени во општините со најголем број иселеници.

На врвот на листата е Тетово, каде што во првата половина од оваа година продажбата на станови се зголемила за 60 отсто во однос на истиот период лани, следуваат Велес, Охрид, Струмица  и Штип.

„Во периферните општини, пазарот е значително помал по обем. Таму бројот на продадени станови е поограничен, а постигнатите цени се пониски во споредба со централните скопски подрачја. Сепак, се забележува постепено оживување на интересот, особено кај купувачите што бараат попристапни решенија и повеќе простор за истата цена“, се наведува во извештајот на Катастарот.

Тетово со троцифрен раст, најголем пад во Аеродром

Кога станува збор за купување станови од инвеститори, разликата во градовите во внатрешноста е уште позначителна. Во Тетово во првите шест месеци од оваа година се купени 350 отсто повеќе станови од лани истиот период.

„Пазарот на станови од инвеститор во помалите градови е поумерен и во однос на бројот на продадени станови и во однос на цената бидејќи побарувачката е послаба. Пораст на бројот на продадени станови од инвеститор во однос на истиот период од претходната година бележат општините Тетово и Чаир, а најголем пад на бројот на продаден станови од инвеститор во скопските централни општини има во Аеродром“, се истакнува во извештајот на Катастарот.

Цените не зависат од обемот на продажбите

Кога станува збор за постигнатите цени, највисок скок на просечната цена на продадени станови од инвеститор споредено со истиот период лани има во скопски Илинден, од 25 отсто. А најголем пад во Чаир, од 12 отсто.

Зголемената продажба ги зголеми и цените во помалите градови. Највисок скок на цените заклучно со јуни годинава има во Охрид, 27 отсто. Цените во Тетово растат со иста динамика како и тие во скопски Центар (22 отсто). Најмал раст на цената има во Струмица, од само два отсто.

Податоците на државната статистика за идните градби покажуваат сличен тренд. Освен во Скопскиот Регион, и во наредниот период најмногу станови ќе се градат во регионите од земјава од каде што има најмногу гастарбајтери.