text size
Според сценаријата за задолжување на Македонија, земјата во следните две три години може да има долг кој надминува 64 отсто од Брутодомашниот производ (БДП). Реалноста е дека позајмувањето е нужност, па веќе е најавено дека во скоро време годинава, Македонија ќе се задолжи со нова еврообврзница. Во следната недела ќе се фокусираме на ова прашање, низ преглед на тоа зошто расте глобалниот јавен долг, но и за тоа во кое сценарио влегува нашата земја.
Индустриското производство на Германија порасна малку повеќе од очекуваното, но земјата е во структурен колапс, па нашите анализи ќе одат во насока на очекувањата кои ги имаат аналитичарите особено за увозниот капацитет на оваа европска економија. Има ли надеж за автоиндустријата или битката со Кина треба да ја прогласиме за изгубена, кои се дополнителните лоши последици за македонската економија?
Пазарите на капитал се светла точка на глобалната економија. Не е тоа баш таков случај и во Македонија иако инвеститорската јавност се буди. Освен во хартии од вредност, на цена е инвестирањето во метали, ама се повеќе се инвестира и во часовници, чанти, скапи автомобили. Кој од Македонија крои такво портфолио, или барем инвестира во ЕТФ кои се врзани за компании за часовници на пример? Правиме анализа. Во посебна анкета ќе прашаме колкави приноси остварија македонските инвеститори во 2025-та година.
Ќе анализираме и за дивидендната политика на домашните компании, односно очекувањата за годинава.
На почетокот на новата година, прашањето на платите и исплатливоста на трудот е нешто што ги засега граѓаните. Стопанството не испорачува толку колку што изеде инфлацијата, а и продуктивноста не се зголемуваше со посакуваниот интензитет. Има ли решение за платите и кои се очекувањата за динамиката на раст - правиме преглед во посебен текст.
И цената на какаото и кафето ќе ни бидат во фокусот следната недела.
.webp){kind=icon}
