Војната со Иран не стивнува, цената на нафтата оди нагоре-надолу реагирајќи на секоја изјава на Трамп, а од полноќ денеска во Македонија се точи поскапо гориво. Новата цена на дизелот е 92 денари за литар, а бензините БС-95 и БС-98 чинат по 86,5 и 88,5 денари за литар. Од почетокот на кризата на Блискиот Исток цената на дизелот во земјава се зголеми за 21 денар, а на бензините за 12 денари по литар.
Македонските граѓани и компании стануваат сѐ понервозни околу оваа ситуација и целиот бран на поскапувања што може да го повлече, додека „Макпетрол“ и „Окта“ си играат “ти давам - не ти давам попуст на набавната цена“.
Преку „големата бара“ завршија уште едни „Оскари“, а Фед и понатаму ќе го нервираат американскиот претседател не брзајќи со намалување на каматните стапки бидејќи конфликтот со Иран, растот на нафтата и слабата потрошувачка ја комплицираат економската перспектива.
Добро утро, ви пишува Игор Петровски од дигиталната редакција на „Блумберг Адрија“ - ова се петте вести што ги издвоивме за почеток на денот.
Зошто цената на златото не расте и покрај војната на Блискиот Исток
Војните вообичаено, може да се каже, имаат многу предвидлив ефект врз финансиските пазари. Инвеститорите ги продаваат ризичните средства, бараат заштита, а парите се влеваат во таканаречени безбедни засолништа. Златото е опција што речиси секогаш е на врвот на листата во оваа приказна, но сега, во оваа војна на Блискиот Исток, за изненадување на многумина, се случува нешто сосема спротивно.
Конфликтот меѓу САД, Израел и Иран трае веќе две недели, ризикот за глобалните резерви на енергија е очигледен, а Ормускиот Теснец, низ кој минува околу една петтина од светската нафта, стана една од клучните геополитички точки на планетата. Сепак, златото не се однесува како што повеќето инвеститори би очекувале во овие околности.
„Made in Europe“ на Макрон загрозува 30.000 работни места во Македонија
Европската комисија на 4 март годинава предложи сеопфатен законодавен пакет, наречен „Закон за индустриски акцелератор - ЗИА“ (Industrial Accelerator Act - IAA), со цел зајакнување на европската индустрија преку зголемување на уделот на материјали и компоненти произведени во ЕУ во јавните набавки, владините стимулации за купување или даночните олеснувања.
Додека Франција инсистира на строга заштита на европските интереси, Германија, Италија, Холандија, Шведска и Полска се плашат дека нивните компании, кои се потпираат на добавувачи надвор од ЕУ, ќе бидат тешко погодени. За земји како Македонија и Србија, на пример, кои се клучни добавувачи во автомобилскиот сектор, овој план може да донесе сериозни последици: загуба на инвестиции, намалена побарувачка и можни отпуштања во фабриките што произведуваат делови за автомобилските гиганти како „Фолксваген“, „БМВ“ или „Стелантис“.
На што се обложуваат инвеститорите додека трае војната во Иран
Војната на Блискиот Исток во изминативе десетина дена беше силен поттик за страв и повлекување на капиталот од финансиските пазари. Инвеститорите сега се обидуваат да проценат колку би можел да трае конфликтот, дали ќе го наруши глобалното снабдување со енергија и што значи тоа за инфлацијата, каматните стапки и цената на имотот низ светот.
Во вакви моменти анализите и прогнозите често заостануваат зад настаните, но едно место нуди речиси моментален увид во расположението на пазарот – предиктивните пазари каде што учесниците се обложуваат на одредени исходи.
Москва брои милијарди, тепачка за руската нафта поради војната во Иран
Москва побрза да товари сурова нафта на танкери за да ги искористи високите цени на нафтата предизвикани од ефективното затворање на Ормускиот Теснец од страна на Иран, како и привремената дозвола од САД државите да ги купуваат тие барели без страв од санкции.
Русија има двојна корист, прво, од високите референтни цени на нафтата на светските берзи, што истовремено ги зголемува руските извозни цени, како и дополнителната придобивка од продолжувањето и проширувањето на ослободувањето од царини од САД што им овозможува на сите купувачи да купат руска сурова нафта натоварена пред 12 март.
Сојузниците на САД го одбиваат барањето на Трамп заедно да го обезбедуваат Ормускиот Теснец
Американските сојузници ги отфрлија барањата на претседателот Доналд Трамп да помогнат во повторното отворање на Ормускиот Теснец, изразувајќи вознемиреност поради тоа што се вовлечени во војната во Иран.
Во Брисел, министрите за надворешни работи на Европската унија нагласија дека не сакаат да ја ескалираат војната, претпазливо коментирајќи дури и околу пренасочувањето на постоечка поморска мисија на Црвеното Море кон виталниот премин за испораки на енергија. Во Јапонија, официјалните лица изјавија дека немаат планови за испраќање бродови за придружба на заглавените танкери. Велика Британија слично нема да се обврзе на целосна поморска мисија, дури и откако премиерот Кир Стармер рече дека ќе истражи опции со сојузниците.
.webp){kind=icon}
