Експанзијата на француската индустриска активност е прекината поради зголемената неизвесност и растот на цените на енергијата, покажува месечното истражување за деловните услови на Централната банка на Франција. Во анкетата се опфатени 8.500 компании, а резултатите покажуваат стабилизација во септември наместо благ раст, како што претходно се очекуваше.
Бизнисмените од индустријата предвидуваат стагнација и во октомври, а најавија натамошно влошување на финансиските позиции поради растечките трошоци за енергија.
Од друга страна, сликата за услужниот сектор е малку пооптимистична. Таму стапката на раст на активноста ќе забави во текот на овој месец, предвидува истражувањето. Француската централна банка ги намали своите проекции за економски раст за третиот квартал на 0,25 проценти, од претходно очекуваните 0,3 отсто.
Bloomberg Mercury
„Услугите и натаму добро се држат, дури регистрираа и раст во септември, што е можно да се преслика и во октомври“, рече гувернерот на централната банка на Франција, Францис Вилрој де Галу, во интервју за „France Culture“. „Меѓутоа, индустријата почнува да трпи последици, а тоа на некој начин е нов феномен, што за жал не е изненадување, бидејќи е поврзан со силниот раст на сметките за енергија“, додаде гувернерот.
Француската економија покажа поголема отпорност на почетокот од економскиот пад, особено преку силниот раст што го регистрираше во вториот квартал. Но, големиот скок на цените на енергијата ги оптеретува фабриките и ги тестира границите на владините мерки за ублажување на зголемените трошоци.
Државната статистичка агенција минатата недела објави дека очекува економскиот раст да падне на нулата во последниот квартал годинава. Гувернерот остана на прогнозата за раст од 2,6 отсто за годинава после што, според него, ќе следува јасно забавување идната година. Тој ги повтори проценките на банката за раст во 2023 година, што се движат меѓу намалување од 0,5 отсто и зголемување од 0,8 отсто, наведувајќи дека ќе постои голема неизвесност.
Во индустријата се влошија нарачките. „Неизвесноста силно расте во индустријата“, рече гувернерот на Француската централна банка. „Тие не знаат колку ќе ги чини енергијата, а во некои случаи не знаат ни дали ќе им биде достапна. Постои напнатост и потешкотии во протокот на пари меѓу индустриските компании“, потенцираше гувернерот, додавајќи дека секторите што се занимаваат со производство на хемикалии и челик, кои што всушност најмногу трошат енергија, трпат најголеми последици.
.webp){kind=icon}
