.webp){kind=icon}
Слабоста на еврото е ризик кој може дополнително да го стимулира растот на потрошувачките цени преку увозот, изјави заменик германскиот министер за финансии, Флоријан Тончар, предупредувајќи дека на Европската централна банка (ЕЦБ) не ѝ требаат многу совети што да прави.
„Мораме да ја разгледаме и вредноста на еврото, во споредба со американскиот долар, на пример - инаку увезуваме инфлација“, рече Тончар во разговор со новинарите од телевизијата Bloomberg, Гај Џонсон и Аликс Стил. „Ако го споредите развојот на вредноста на еврото во однос на американскиот долар, ќе забележите одреден пад, а тоа на крајот го прави и увозот поскап - и увезува инфлација“.
Иако единствената европска валута се искачи над паритет со доларот за првпат по повеќе од еден месец, таа не го избриша значителниот годинешен пад кој придонесе да се поттикне растот на потрошувачките цени. Инфлацијата неодамна достигна 9,9 отсто, а ЕЦБ агресивно ги зголемува каматните стапки за да ја контролира.
Забелешките на Тончар се спротивни од неодамнешните коментари на другите европски лидери кои го истакнаа ризикот од рецесија и сугерираа дека трошоците за задолжување во еврозоната не треба да се зголемуваат прекумерно.
Италијанската премиерка Џорџа Мелони во вторникот рече дека зголемувањето на стапката „многумина го сметаат за непромислен избор“. Францускиот претседател Емануел Макрон минатата недела во печатот изјави дека е загрижен што некои креатори на политиката сакаат да ја „растурат побарувачката“ за да ја скротат инфлацијата.
Претходно овој месец, финската премиерка Сана Марин на „Твитер“ објави цитат дека нешто „сериозно не е во ред со доминантните идеи за монетарната политика, кога централните банки го штитат нивниот кредибилитет со тоа што ги водат економиите во рецесија“.
Тончар предложи ЕЦБ да се остави да дејствува по сопствена волја.
„ЕЦБ има мандат да обезбеди стабилност на цените и, се разбира, тоа е огромен предизвик“, рече тој.
„Донесувањето одлуки е независно - мислам дека владите не треба да даваат премногу совети. Не можам да видам дека ЕЦБ прави нешто невообичаено во споредба со другите сродни институции“, посочи Тончар.
