Инфлацијата во еврозоната останува блиску до историски највисокото ниво, но очекувањата на потрошувачите за патот на цените во голема мера се вратија на својата долгорочна норма.
Во Германија, Италија и Шпанија, три од четирите најголеми економии, вознемиреноста од инфлацијата во текот на следната година е блиску или под просекот од воведувањето на еврото во 1999 година, покажуваат податоците на Европската комисија (ЕК).
Тоа ќе биде олеснување за Европската централна банка (ЕЦБ), која се трудеше да ги задржи очекувањата за идните цени и утре ќе го објави своето месечно истражување за ставовите на 350 милиони граѓани во регионот.
Bloomberg Mercury
Но и ако се земе предвид подобрувањето што го откри ЕК, инфлацијата не е ни блиску до зоната на удобност на креаторите на политиката. Во Франција, на пример, потрошувачите остануваат позагрижени за цените од вообичаено. Тоа е случај и во Хрватска, која на почетокот од годинава се приклучи во еврозоната.
Од таа причина, дури и кога инфлацијата се враќа на едноцифрено ниво и цените на природниот гас паѓаат, официјалните лица велат дека каматните стапки сепак мора значително да се зголемат. Еве што влијае на ставовите за инфлацијата во најголемите економии во еврозоната, како и во нејзината најнова членка.
Германија
Еден век откако хиперинфлацијата ја уништи економијата, стравот од спирален раст на цените останува дел од ДНК на многу Германци и објаснува зошто просечното ниво на загриженост е повисоко отколку во поголемиот дел од европските земји. Владиното ограничување на цената на гасот го ублажи ударот од последната инфлаторна епизода, во која беше забележан раст на цените од дури 11 проценти. И додека е во сила таа мерка, помага и невообичаено топлото зимско време.
Франција
Потрошувачите имаат корист од една од најдарежливите европски држави во делот на поддршка за да се компензира скокот на цените на енергијата. Но загриженоста се зголеми во 2023 година, бидејќи владата ги укина попустите за бензините и дизелот и ги намали ограничувањата за тоа колку може да се зголемат сметките за домаќинствата.
Италија
Иако инфлацијата во оваа земја е меѓу најбрзите во регионот, Италијанците се позагрижени за влијанието на повисоките каматни стапки на ЕЦБ врз економскиот раст и способноста на државата да го финансира својот огромен јавен долг. Новата влада, предводена од десничарската премиерка Џорџа Мелони, потроши околу 75 милијарди евра за да ги заштити семејствата и бизнисите од најлошото зголемување на цените на енергијата, вклучувајќи и намалување на даноците и попусти на горивото на бензинските пумпи.
Шпанија
Шпанија најави нова серија мерки во вредност од 10 милијарди евра за да се одржи надолниот ценовен притисок во 2023 година, откако инфлацијата нагло се намали во последните месеци. Во почетокот на годината, премиерот Педро Санчез ги укина скапите субвенции за гориво, но воведе нови даночни олеснувања за основните производи за да ја олесни инфлацијата на храната, која се движи околу 15 проценти. Неговата влада, исто така, ги задржа намалувањата на даноците за енергија и планира од Брисел да побара продолжување на ограничувањето на цената на гасот за Пиринејскиот Полуостров.
Хрватска
Усвојувањето на заедничката валута овој месец поттикна некои трговци на мало и даватели на услуги во 20-та членка на еврозоната да ги зголемат цените, зголемувајќи ја со тоа и загриженоста кај потрошувачите. Премиерот Андреј Пленковиќ минатата недела ги повика бизнисите да ги вратат цените на декемвриските нивоа и им се закани со неодредени санкции доколку не го почитуваат тоа.
.webp){kind=icon}
