Од септември 2021 година до јануари годинава, членките на Европската Унија доделиле 681 милијарда евра за ублажување на влијанието на енергетската криза, Британија 103 милијарди евра, а Норвешка 8,1 милијарди евра. Луксембург, Данска и Германија издвојуваат најголеми суми по жител, се вели во анализата на аналитичкиот центар „Бригел“ (Bruegel), објавена во понеделникот.
Резервираната сума е за 12,2 отсто поголема, односно се искачи на 792 милијарди евра во однос на предвидувањата на „Бригел“ од ноември. По Германија, која потрошила најмногу, речиси 270 милијарди евра, следуваат Велика Британија, Италија и Франција, кои поединечно издвоиле по нешто помалку од 150 милијарди евра. Повеќето земји од ЕУ потрошиле само мал дел од таа сума.
На тој начин, буџетските трошења на ЕУ за ублажување на последиците од енергетската криза се приближија до фондот на ЕУ за закрепнување од пандемијата на ковид-19 од 750 милијарди евра.
Поголемиот дел од износот е канализиран од владите за ограничување на малопродажните цени на енергијата, како што е намалување на ДДВ на бензинот или ограничување на малопродажните цени на струјата, се вели во анализата на „Бригел“. Аналитичкиот центар смета дека оваа динамика мора да се промени бидејќи на државите им снемува фискален простор.
„Наместо мерките што всушност ја субвенционираат потрошувачката на фосилни горива, владите сега треба повеќе да се свртат кон мерки за поддршка на приходите на двата најниски квинтила во дистрибуцијата на доходот и стратегиските сектори на економијата“, посочи истражувачкиот аналитичар Џовани Сгаравати.
.webp){kind=icon}
