Стапката на инфлација во Велика Британија остана тврдоглаво висока и двоцифрена во март, што претставува уште едно изненадувачки силно читање на податоците што ќе ја зајакне можноста за повеќе зголемувања на каматните стапки од страна на централната банка, Банката на Англија.
Индексот на потрошувачките цени во март се зголеми за 10,1 отсто споредено со истиот месец претходната година, поттикнат од најсилното зголемување на цените на храната во повеќе од четири децении, објави утрово Канцеларијата за национална статистика. Економистите очекуваа забавување до 9,8 проценти.
Движење на стапката на инфлација во Обединетото Кралство / Bloomberg Mercury
Бројките го зголемуваат притисокот врз Банката на Англија да го продолжи најбрзиот циклус на зголемување на каматните стапки во последните четири децении. Креаторите на политиката, предводени од гувернерот Ендрју Бејли, сигнализираа дека е можна пауза доколку се смират инфлациските притисоци, но денешните податоци сугерираат дека цените во Обединетото Кралство имаат поголем импулс отколку во САД или во еврозоната.
„Работата на Банката на Англија сè уште не е завршена. За да се решат основните прашања со индексот на потрошувачки цени, повторно треба да се зголемат стапките“, рече Кити Ашер, главна економистка во Институтот на директори (Institute of Directors).
По објавата на податоците за инфлацијата, фунтата скокна во однос на еврото, поскапувајќи за повеќе од еден отсто. Државните обврзници на Обединетото Кралство паднаа.
Инфлацијата во услужниот сектор остана непроменета и изнесува 6,6 проценти. Непроменета остана и базичната инфлација, која ги исклучува цените на храната и енергијата, која изнесува 6,2 отсто. Но храната и безалкохолните пијалоци поскапеле за дури 19,1 отсто, најмногу од 1977 година.
„Главните двигатели на падот беа цените на моторните горива и трошоците за греење, а и двете се намалија по остриот пораст минатата година. Меѓутоа, тоа само делумно ја неутрализира цената на храната, која сè уште нагло расте, регистрирајќи рекордно високо ниво на инфлација на цената на лебот и житата“, рече главниот економист на ОНС (ONS), Грант Фицнер.
„Овие бројки потврдуваат точно зошто мора да продолжиме со нашите напори да ја намалиме инфлацијата за да можеме да го намалиме притисокот врз семејствата и бизнисите. Ние сме на пат да го направиме тоа“, рече министерот за финансии Џереми Хант.
Банката на Англија размислува дали може да го паузира својот најбрз циклус на затегнување на монетарната политика во последните четири децении, очекувајќи дека инфлацијата нагло ќе падне до крајот на оваа година.
.webp){kind=icon}
