.webp){kind=icon}
Водечките централни банки во Европа треба да бидат внимателни во врска со можните ризици од напнатост во финансискиот систем и кај движењето на приносите на обврзниците, додека продолжуваат со зголемувањето на каматните стапки, оцени Меѓународниот монетарен фонд (ММФ).
Според извештајот објавен во петокот, инфлацијата останува главен фокус, но треба да се внимава и на ризиците што доведоа до неодамнешните проблеми во банките, како оној во „Кредит Суис“ (Credit Suisse).
„Иако солидните слоеви на капитал и ликвидност во еврозоната и Обединетото Кралство обезбедуваат заштита, неодамнешните проблеми во банкарскиот сектор покажуваат дека тешкотии во ликвидноста и финансиски стресови може да се појават одеднаш. Таква нова епизода би ја поткопала постојната заштита, особено кај банките со послаба основа и силно заострени кредитни и општи финансиски услови“, предупредува ММФ.
Истовремено, оттаму признаваат дека засега нема друг избор освен да се продолжи со зголемување на каматите.
„Високата и упорна базична инфлација бара заострување на монетарната политика додека не се врати во целната рамка. Исто така, фактот што економската стагнација во многу европски економии не е толку силна, и покрај серијата неодамнешни шокови, укажува на инфлаторни ризици“, велат од ММФ.
Алфред Камер, претставникот на ММФ за Европа, за ТВ „Блумберг“ изјави дека најлошо би било прерано да се олабави затегнувањето на монетарната политика, бидејќи тоа би довело до ново заострување, кое само ќе ги зголеми вкупните трошоци за борбата против инфлацијата.
Многу европски земји продолжуваат да ги зголемуваат каматните стапки во 2023 година
Bloomberg Mercury
Во Обединетото Кралство, каде што е веројатна рецесија, а притисокот на цените е нешто помал, мора да продолжи во истата насока, според ММФ.
ММФ во моментов проценува дека Европската централна банка (ЕЦБ) кумулативно ќе ја подигне каматната стапка за уште 75 базични поени, на 3,75 отсто. Следниот состанок на Советот на ЕЦБ е на 4 мај.
„Понатамошниот раст на каматните стапки во еврозоната е неопходен, додека централните банки во европските економии во развој мора да бидат подготвени за натамошно затегнување онаму каде што реалните стапки се ниски, пазарот на трудот се карактеризира со недостиг од работна сила, а базичната инфлација останува упорно висока“, се наведува во извештајот на ММФ.
Тие додаваат дека ЕЦБ може да ја продолжи со намалување на билансот на состојбата, но тоа треба да се прави внимателно.
„Финансиската фрагментација, вклучувајќи ги и зголемените разлики во трошоците за финансирање одредени земји и ризиците за финансиската стабилност во поширока смисла, повикува на претпазливост и флексибилност, односно подготвеност за промена на политиката во случај на потреба“, посочува ММФ.
