Унгарија неочекувано потона подлабоко во рецесија поради нејзината најдолга економска контракција во последните 28 години, додека војната во Украина продолжи да го поткопува економскиот раст низ источното крило на Европската Унија.
Економијата на Унгарија се намали за 0,3 отсто од април до јуни во споредба со претходните три месеци, четврта по ред контракција спротивна на очекувањата на аналитичарите во истражувањето на „Блумберг“, за раст од 0,2 отсто. Економијата падна за 2,4 отсто во однос на претходната година, објави во средата Заводот за статистика. Четирите последователни квартални намалувања се најмногу од почетокот на евиденцијата во 1995 година.
Полска, најголемата економија во регионот, најверојатно падна за 2,3 отсто во вториот квартал од претходните три месеци, според друго истражување, што, пак, е трето намалување од минатата година. Соочени со најбрзиот раст на цените во четврт век, се очекува падот да се ублажи за 0,3 отсто на годишно ниво.
Влијанието на руската инвазија ја крена инфлацијата на две цифри во најлошата европска криза за трошоците на животот во последните децении и ги поттикна централните банки да ги зголемат каматните стапки. Поради тоа, евидентирана е помала потрошувачка кај компаниите и домаќинствата, што ја задушува економската експанзија на повеќето економии од Балтикот до Црно Море.
Унгарија влегува подлабоко во рецесија
Bloomberg
Томас Дворжак, висок економист во „Оксфорд економикс“ (Oxford Economics), вели дека ограничувачкиот ефект на инфлацијата и построгата монетарна политика требаше да почнат да се намалуваат на крајот на минатиот квартал, иако слабата побарувачка во еврозоната ја намали побарувачката за извоз.
„Како што се намалува инфлацијата, а централните банки сè повеќе гледаат кон нормализација на политиката, домашната побарувачка треба малку да се зголеми“, рече Дворжак пред објавувањето на унгарските податоци. „Но мислиме дека тоа ќе биде многу постепено, дека нема да заземе значителна брзина пред крајот на годината“.
Кризата за трошоците на животот во полската економија вредна 690 милијарди долари е главна точка на расправа пред националните избори на 15 октомври, на кои владејачката партија Право и правда води во анкетите, но се чини дека нема мнозинство.
Трендот продолжува да се шири низ регионот. Во Чешка, каде што инфлацијата падна на едноцифрена во јуни, за првпат во последните 16 месеци, економијата порасна за само 0,1 отсто во однос на претходниот квартал.
Романија е исклучок, со постојан пораст на бруто-домашниот производ од пандемијата. На тримесечно ниво порасна за 0,9 отсто, што е подобро од очекуваното, додека во однос на претходната година порасна за 1,1 отсто, покажуваат податоците објавени во средата.
Од другите земји во регионот, Словачка оствари раст од 1,5 отсто на годишно ниво, надминувајќи ги очекувањата, додека Србија оствари раст од 1,7 отсто, што е повеќе од очекуваното во споредба со претходната година. Прогнозата за Бугарија, која в среда ќе ги објави своите податоци, покажува слаб, но стабилен раст.
.webp){kind=icon}
