ММФ: Трговската поделба ќе го чини светот 1,4 илјада милијарди долари

„Зголемувањето на трговските бариери против Кина и други земји може да ја чинат светската економија 1,4 илјада милијарди долари, покрај сериозната штета што ја направи војната во Украина“, рече претседателката на Меѓународниот монетарен фонд (ММФ).

„Тоа на што се надевам е дека ќе видиме некаков пресврт во политичките блокови кон Кина и на глобално ниво. Светот ќе загуби 1,5 процент од бруто-домашниот производ (БДП) само поради поделбата што може да доведе до формирање на два трговски блока. Тоа е 1,4 илјада милијарди долари“, рече Кристалина Георгиева во интервју за Блумберг ТВ.

„За Азија потенцијалната загуба би можела да биде двојно повисока, или повеќе од три проценти од БДП, бидејќи регионот е повеќе интегриран во глобалниот синџир на вредности“, рече Георгиева неделава на маргините на економскиот собир на лидерите за Азиско-пацифичката економска соработка. „Иако тоа би претставувало значајна штета за светската економија, најголем фактор што му наштетува на глобалниот раст останува војната во Украина“, рече Георгиева.

„Најштетно влијание за светската економија има војната. Колку побрзо заврши, толку подобро“, рече таа. ММФ, исто така, предупреди и дека инфлацијата најмногу ги погодува земјите во развој, повикувајќи ги централните банки да ја продолжат својата борба за забавување на растот на цените, особено на прехранбените производи.

Двоцифрената апрецијација на доларот досега оваа година продолжи да предизвикува главоболки на пазарите во развој, бидејќи инвеститорите одат кон сигурни пазари, поради знаците дека голем дел од светската економија може да влезе во рецесија.

Георгиева рече дека азиските земји мора да работат заедно за да го одржат растот, особено сега, во услови кога има уште неколку други економски шокови предизвикани прво од ковид-пандемијата, потоа од војната во Украина, како и од сѐ поголемите трошоци за живот.

Истурање бензин

„Ако на тоа ја додадеме и поделбата на светската економија, тоа би значело додавање бензин на огнот. Никој нема да има корист од тоа“, рече Георгиева, Сепак, таа напомена дека земјите од Азија многу подобро се подготвени да се соочат со економските шокови благодарение на значајните резерви и интерната соработка во регионот.

Што се однесува до растечкиот ризик од државен долг во земјите во развој, Георгиева рече дека ММФ уште не е вознемирен, но е претпазлив. Околу 25 проценти од пазарот во развој тргува на проблематични подрачја, додека 60 проценти од земјите со низок доход се во должничка криза или блиску до тоа.

Георгиева ги повика нациите што се оптоварени со сѐ поголеми трошоци за сервисирање на долгот во долари да дејствуваат превентивно и порано да побараат помош од фондот.

Секторот за истражување на ММФ претходно, во текот на неделава, ги објави своите прогнози, чиј тон е поостар во споредба со минатомесечните, велејќи дека тешкотиите се огромни. Фондот минатиот месец ја намали својата прогноза за светскиот економски раст за следната година на 2,7 проценти, значајно помалку на пример од јануари, кога очекувањата беа 3,8 отсто. ММФ смета дека веројатноста растот да биде помал од два отсто е 25 проценти.

Пресметките на ММФ покажуваат дека околу една третина од светската економија ќе има контракции најмалку две тримесечја по ред, како и дека изгубеното производство до 2026 година ќе изнесува четири илјади милијарди долари.

Георгиева укажа и на посебните тешкотии со кои се соочува Европската Унија (ЕУ) поради војната во Украина, што би можело да изврши притисок на централните банки од регионот прерано да ги повлечат напорите за решавање на инфлацијата.

„Во Европа ситуацијата е потешка поради значајното влијание од војната во Украина. Најмалку половина од земјите од ЕУ може да бидат во рецесија следната година“, рече претседателката на ММФ, Георгиева.

Во моментов нема коментари за веста. Биди прв да коментира...

Остави коментар