.webp){kind=icon}
Европската централна банка (ЕЦБ) не смее да прифати пристап на тестирање на економијата до пресвртна точка и, наместо тоа, треба да се фокусира и да опстои на високите каматни стапки, смета членот на Управниот совет Франсоа Вилерој де Галхау, кој е гувернер на Банката на Франција.
По подигнувањето на стапката на депозити на 4 проценти овој месец, опасноста да се направи премногу мора да се избалансира со ризикот да не се направи доволно, рече во понеделникот шефот на Банката на Франција во говорот во Париз.
„Недостатоците од недоволното дејствување се ’совладливи’, бидејќи ЕЦБ лесно може да зголемува дополнително доколку растот на цените остане упорен над целта од 2 отсто“, рече Вилерој. Сепак, може да биде потребен остар пресврт доколку се притиска предалеку и доколку економијата отиде во рецесија, а инфлацијата забави нагло, рече тој.
„Тестирањето додека не се расипе сè не е разумен начин за калибрирање на монетарната политика“, рече Вилерој. „Ова сугерира дека сега треба да се фокусираме на истрајност на политиката наместо на постојано кревање на стапките - да се инсистира на траењето наместо на нивоата“.
Франсоа Вилерој де Галхау/Bloomberg Mercury
Коментарите укажуваат на јасна склоност да не се зголемуваат стапките дополнително, иако францускиот функционер рече дека неговата омилена стратегија не претставува став и на сите членови на Советот во ЕЦБ.
Податоците подоцна во текот на денот покажаа само маргинално подобрување на деловните изгледи во Германија, чија економија се очекува да се намали овој квартал. Клеменс Фуест, кој го предводи институтот „Ифо“ (Ifo), кој ги обработува податоците, изјави дека чувството „останува мрачно“.
Иако досега избегнуваше рецесија, самата еврозона се соочува само со слаб раст. И покрај тоа, некои од колегите на Вилерој во ЕЦБ зазедоа поостар став: шефот на Бундесбанк, Јоаким Нагел, минатата недела рече дека е прерано да се каже дека стапките го достигнале врвот.
Но, во забелешките за „Маркет њуз“ (Market News), објавени денеска, летонскиот гувернер Мартинс Казакс рече дека „многу соодветното“ зголемување на четврт поен во септември може да дозволи пауза во октомври. Гувернерот на Банката на Шпанија, Пабло Хернандез де Кос, рече дека инфлацијата треба да се врати на целта доколку трошоците за позајмување се задржат на сегашното ниво некое време.
Вилерој - чиј говор беше насловен „Монетарна политика во еврозоната: дали беше предоцна? Или сега може да биде премногу?“ - рече дека ЕЦБ е сè поуверена дека може да ја врати инфлацијата на 2 отсто до 2025 година, што значи дека функционерите можат да вклучат секундарна цел за обезбедување непречен пат за економијата.
„Ако можеме да стигнеме до дестинацијата со меко слетување наместо тешко, тоа е многу подобра маршрута“, рече тој.
