Германија за влакно избегна рецесија

Германија за влакно избегна рецесија. Според прелиминарните податоци на германската статистика објавени денеска, во последното тримесечје од 2023 година (октомври-декември) БДП се намалил за 0,3 отсто, но тоа не значи дека економијата во земјата е во минус два квартала по ред затоа што се ревидирани податоците за третиот квартал од минатата година.

Имено, претходните податоци покажаа дека германската економија во периодот од јули до септември забележала пад од 0,1 отсто, но сегашната ревизија покажува дека БДП во тој период стагнирал, изнесувал 0 отсто.

Сепак, тоа беше тешка година за земјата: во текот на сите 12 месеци производството се намали за 0,3 отсто – што е прв пад од пандемијата. Тоа е сосема спротивно од нејзините конкуренти низ светот и отвора многу прашања за иднината на земјата како индустриска велесила.

Bloomberg Mercury

Расположливите податоци покажуваат дека Германија е единствената голема развиена земја во светот што не успеа да регистрира економски раст минатата година – најмногу поради нејзиниот производствен сектор, кој се бори со повисоките трошоци за енергија, зголемените каматни стапки и потиснатата странска побарувачка.

Германската криза се чувствува во Македонија

Германија е најголем трговски партнер на Македонија и тамошната криза се чувствува во земјава уште од половината на минатата година, кога почна да се намалува извозот. Според пресметките на аналитичкиот тим на „Блумберг Адрија“, во приодот до јули до ноември лани извозот кон Германија се намалил за над 15 отсто.

„Кога ќе го погледнеме периодот од јули до ноември во 2023 година, може да забележиме пад на вкупниот извоз за 5,8 отсто, по растот од првата половина во 2023 година. Причина за тоа е забавувањето на Европската Унија (ЕУ), која е главен извозен партнер на Македонија, но особено падот на извозот во Германија од 15,2 отсто од седмиот до единаесеттиот месец во 2023 година“, вели Михаел Блажековиќ, аналитичар на пазари во „Блумберг Адрија“.

Економијата на Македонија е многу зависна од движењето на германската економија. Имено, дури 44 отсто од вкупниот годишен извоз оди во Германија. На ист начин индустријата во земјава е висококонцентрирана, така што 30 отсто од вкупниот извоз се хемиски и сродни производи, чиј извоз во периодот од јули до ноември 2023 година падна за 18 отсто.

„Позитивна вест е што извозот од минус се претвори во нула во единаесеттиот месец од 2023 година поради растот на извозот на индустриска опрема и машини. Очекуваме дека извозот ќе се стабилизира, со оглед на тоа што најверојатно е избегната рецесијата во Германија, но не очекуваме значителен раст со оглед на големата зависност на економијата од Европската Унија, а економијата на Македонија треба да се преориентира кон други земји и различни индустрии заради диверзификација и зајакнување на отпорноста на економијата“, заклучува Блажековиќ.

 

 

Прогнозите за Германија остануваат неповолни

Разочарувачките податоци за германската економија лани ја поттикнаа дебатата за тоа дали земјата повторно се претвора во „пациентот“ на Европа – назив што првпат го доби по повторното обединување во 1990-тите, кога економијата се соочи со тешкотии, а невработеноста се зголеми.

Највисоките функционери, министерот за финансии Кристијан Линднер и претседателот на Бундесбанка, Јоаким Нагел, ги отфрлија таквите тези, инсистирајќи дека земјата докажала дека може да се приспособи на променливата средина.

Сепак, централната банка ги призна предизвиците што ги донесе бизнис-моделот што долго време се засноваше на увоз на руски енергенти и големата зависност од Кина.

Иако цените на природниот гас драстично паднаа од времето кога Кремљ го прекина снабдувањето, тие сè уште се повисоки отколку пред избувнувањето на пандемијата. Хемиската индустрија е меѓу најтешко погодените сектори, при што компаниите како БАСФ (BASF SE) и „Ланкес“ (Lanxess AG) реагираат со одложување на инвестициите и отпуштање работници.

Bloomberg Mercury

Продолжените расправии во трипартитната коалиција на канцеларот Олаф Шолц ја отежнуваат ситуацијата и сè потешко е да се постигне договор за решавање на проблемите на Германија. Неодамна, незадоволството од владата доведе до протести на земјоделците, кои минатата недела го прекинаа сообраќајот низ земјата и го одржаа својот главен собир во Берлин.

Постојаната загриженост за изгледите на Германија се рефлектира и во прогнозите за годинава. ОЕЦД во ноември соопшти дека растот од 0,6 отсто ќе биде најбавен меѓу сите членки на Групата 20. Само Аргентина ќе има полош резултат од Германија.

Со помош на Александар Вебер и Иан Роџерс

Во моментов нема коментари за веста. Биди прв да коментира...

Остави коментар