Француската инфлација падна на најниското ниво од септември 2021 година – засилувајќи ја дебатата за тоа кога Европската централна банка треба да ги намали каматните стапки.
Потрошувачките цени во втората по големина економија во еврозоната се зголемија за 3,1 отсто во февруари во однос на претходната година, што е намалување од 3,4 отсто во однос на претходниот месец и во согласност со истражувањето на економистите на „Блумберг“.
Одвоени податоци покажаа дека инфлацијата во Шпанија исто така забави – на 2,9 отсто од 3,5 отсто – иако малку ги надмина очекувањата.
Bloomberg Mercury
Денеска ќе бидат објавени и податоци за инфлацијата во Германија, каде исто така се очекува забавување. Евростат утре ќе ги објави податоците за 20-члената еврозона, а аналитичарите предвидуваат намалување на 2,5 отсто од 2,8 отсто.
„Борбата против инфлацијата е добиена“, рече францускиот министер за финансии Бруно Ле Мер во објава на X, поранешен Твитер. „До крајот на годината треба да бидеме блиску до целта од два отсто“.
Општото повлекување кон целта од два отсто, поставена од ЕЦБ, доаѓа откако цените на енергијата се намалија и европската економија влезе во стагнација. Официјалните лица во Франкфурт, сепак, предупредуваат на ризиците од предвремено олабавување на монетарната политика, поради стравувањата од нов притисок врз цените. Тие се особено фокусирани на платите и очекуваат да имаат појасна слика дури за време на јунскиот состанок.
Загрижувачки е тоа што големите зголемувања на платите ја поттикнуваат инфлацијата во услужниот сектор, која благо се намали во Франција на 3,1 отсто во февруари од 3,2 отсто во претходниот месец. Во меѓувреме, стоковната инфлација падна на 0,3 од 0,7 отсто, покажуваат податоците на државната статистика во Франција.
Француските потрошувачи не се убедени дека ценовните притисоци ќе продолжат да се намалуваат: овонеделното истражување покажа дека очекувањата на домаќинствата нагло се зголемија во февруари.
Bloomberg Mercury
Посебен извештај покажува дека потрошувачката паднала за 0,3 отсто на месечно ниво во јануари. Економистите очекуваа пад од 0,2 отсто.
Има и посветли вести за француската економија минатата година бидејќи државната статистика го ревидираше податокот за бруто домашниот производ во четвртиот квартал на 0,1 отсто. Претходно беше објавено дека земјата е во стагнација.
.webp){kind=icon}
