Економијата на Обединетото Кралство веќе е во рецесија затоа што растечките трошоци за живот имаат разорни последици за приходите на домаќинствата, заклучува водечкиот Тинк тенк.
Во црната проценка на Националниот институт за економски и општествени истражувања, утврдено е дека просечниот реален расположив доход ќе падне за невидени 2,5 отсто годинава и ќе остане седум отсто под нивото кое го имаше пред ковид пандемијата. На ова ниво ќе се задржи до 2026 година.
„Економијата во Обединетото Кралство влегува во период на стагфлација со висока инфлација и рецесија кои истовремено ја погодуваат економијата“ вели Стивен Милард, заменик директор на Институтот задолжен за макроекономија.
Исто така се проценува дека бројот на домаќинства кои живеат од плата до плата речиси двојно ќе се зголеми и ќе стигне до седум милиони до 2024 година, вклучувајќи и 5,3 милиони без никакви заштеди. Овие домаќинства ќе бидат принудени или да се здолжуваат или ќе заостануваат со плаќањето на сметките за енергија кои им ги голтаат приходите, велат од организацијата.
Предупреудвањето за рецесијата, за која Институтот тврди дека почнала ова тромесечие и ќе продолжи до почетокот на 2023 година, е јасен потсетник за предизвиците со кои се соочуваат двајцата кандидати за наследник на Борис Џонсон на местото премиер. Економистите велат дека длабоката криза ќе ја натера Владата да одговори, сугерирајќи дека е потребна дефинирана цел наместо пристап за управување со финансиите како во минатото
Анализата покажува и дека се зголемува економскиот јаз меѓу Лондон и остатокот од Велика Британија. Тоа значи дека владината политика за изедначување на помалку богатите подрачја не дава резултати.
Тинк Тенкот сугерира дека на најранливите во Обединетото Кралство потребна им е натамошна помош за борба со инфлацијата за која се прогнозира дека годинава ќе порасне на речиси 11 отсто.
Во меѓувреме, инфлацијата на малопродажните цени, поширока мерка која се користи за одредување на цените, ќе стигне со 17,7 отсто, најмногу по 1980 година.
Како одговор на овие случувања, Банката на Англија, следната година ќе ги дигне каматите на три отсто, а неврабоеноста ќе порасне над пет отсто затоа што се намалува побарувачката.
„Сега останува Одборот за монетарна политика да гарантира дека инфлацијата следната година ќе се намалува, а новиот канцелар да ги поддржи домаќинствата кои се најпогодени од рецесијата и растот на цените“, вели Милард.
.webp){kind=icon}
