text size
Нивото на водата во реката Рајна е опасно блиску до точка каде што пловидбата веќе нема да биде возможна, што го става на ризик транспортот на стоки, вклучително и на енергенси како јагленот, во време кога Европа веќе се бори со нарушени синџири на снабдување и енергетска криза.
Водостојот на реката кај местото Кауб во Германија се очекува до викендот да падне на 47 сантиметри, што е само седум сантиметри од критичната точка.
Неможноста за навигација би го запрела протокот на стоки, од гориво до хемикалии.
Пад на БДП
„Превозот на јаглен е веќе ограничен поради ниското ниво на вода бидејќи има помалку бродови на располагање, а оние што можат да се користат транспортираат помалку товар. Ова ги зголемува транспортните трошоци, што потоа ги зголемува трошоците на термоелектраните на јаглен“, соопштија од енергетската компанија EnBW.
Кога последен пат нивото на водата паднало толку ниско за време на топлотниот бран во 2018 година, германскиот раст бил за 0,4 отсто помал поради нарушувањето во последниот квартал, оценуваат аналитичарите на JPMorgan. Сега потребата од речен транспорт е значително поголема поради проблемот со протокот на гас од Русија.
Рајна, која се протега приближно 1.300 километри од Швајцарија до Северното Море, е река од суштинско значење за транспорт на различни видови енергенси како што се мазут, бензин, јаглен и други стоки.
Bloomberg Mercury
Нивото на водата кое се мери за безбеден транспорт не е вистинската длабочина на реката. Во Кауб, на пример, кога измереното ниво беше на 90 сантиметри, вистинската длабочина на реката беше околу два метра.
Претставник на германскиот сојузен хидролошки институт минатиот месец изјави дека кога измереното ниво ќе падне под 40 сантиметри, транспортот станува неисплатлив.
Поради прекини во транспортот, Швајцарија веќе почна да користи гориво од своите резерви, а испораката на гориво е во неволја и во Централна Европа поради одржувањето на некои рафинерии во Германија, Чешка и Австрија.
Проблеми и поради Тајван
„Поради проблемите со Рајна и поскапите алтернативи, како што е патниот или железничкиот транспорт, ќе биде тешко да се соберат доволно количества залихи гориво во Германија и Швајцарија пред да паднат температурите“, рече европскиот нафтен аналитичар Џош Фолдс од консултантската компанија Facts Global Energy.
Логистички проблеми се јавуваат и во други делови на светот поради тензиите околу Тајван и најавените кинески воени вежби во близина на островот. Превозниците на течен природен гас (LNG) ја пренасочуваат или ја намалуваат брзината на пратките од некои бродови кои се на пат за Северна Азија за да избегнат проблеми во теснецот меѓу Тајван и континентална Кина.
.webp){kind=icon}
