Нов удар за најголемите економии во еврозоната, паѓа деловната активност

Двете најголеми економии во еврозоната месецов забележаа пад на деловната активност на приватниот сектор бидејќи проблемите во производството во Германија се влошија, а француската услужна индустрија потона.

Индексот на менаџери за набавка на „Ес енд Пи глобал“ (S&P Global) за Германија падна повеќе од очекуваното, на 47,2 - што претставува најниско ниво во последните седум месеци и сè уште е под границата од 50 што го дели растот од пад. Франција од 53,1 падна на 47,4, а тоа е далеку помалку од 51,5, колку што предвидуваа аналитичарите анкетирани од „Блумберг“.

По објавата на овие податоци, еврото се лизна, тргувајќи се за 0,5 проценти поевтино, односно за 1,1106 долар. Државните обврзници во еврозоната напредуваа, при што приносот на 10-годишните германски обврзници падна дури за четири базични поени.

Податоците објавени денеска упатуваат на тоа дека забавувањето на економијата во валутниот блок составен од 20 држави станува сè поизразено откако растот исчезна на почетокот на годината. Пониските каматни стапки може да понудат поддршка. Европската централна банка (ЕЦБ) во септември ја олабави монетарната политика по вторпат годинава и веројатно ќе го стори тоа повторно. Но многу од проблемите се структурни и бараат потешки интервенции.

Германија останува главната слаба точка, каде што „Бундесбанк“ предупреди дека е можна мала рецесија по низата лоши вести од производителите на автомобили. „Мерцедес-Бенц“ (Mercedes-Benz Group AG) беше последниот што ги разочара инвеститорите минатата недела и му се придружи на БМВ (BMW) во насоките за намалување на приходите. Во меѓувреме, „Фолксваген“ (Volkswagen AG) предупреди дека слабата побарувачка може да ја принуди компанијата да затвори некои од фабриките на својот домашен пазар.

„Анкетираните компании ги истакнаа зголемената претпазливост меѓу клиентите и поврзаната инвестициска воздржаност, при што загриженоста за здравјето на економијата е еден од наведените фактори“, велат од „Ес енд Пи глобал“.

Аналитичарите што ги анкетираше „Блумберг“ очекуваат Германија да го обнови растот кон крајот на годината. Виновник во голема мера е падот на фабричкото производство. Индексот на „Ес енд Пи“ за германското производство падна на едногодишно најниско ниво, додека услугите речиси стагнираа.

„Падот во производствениот сектор повторно се продлабочи, потиснувајќи ја секоја надеж за скорашно закрепнување. Ваквите вознемирувачки бројки веројатно ќе ја интензивираат тековната дебата во Германија за ризикот од деиндустријализација и што треба да направи владата во врска со тоа“, рече Сајрус де ла Рубија, главен економист во Хамбуршката комерцијална банка, потенцирајќи дека се чини дека е неизбежна техничка рецесија.

Олимпијадата заврши, а со неа и растот на услужниот сектор во Франција

Франција претрпе пад во дејностите поврзани со услуги, кои добија изненадувачки силен поттик од Олимпијадата во Париз. Индексот падна на 48,3 од 55. Аналитичарите предвидуваа многу повеќе, односно дека ќе изнесува 53,1.

Банката на Франција очекува годинава економијата да порасне за 0,8 проценти, иако тоа е дискутабилно поради политичката неизвесност по парламентарните избори. Новата влада на премиерот Мишел Барние сега мора да го заузди буџетскиот дефицит, кој е многу над границата на Европската Унија (ЕУ) од три отсто.

„Франција се приклучува на групата економии од еврозоната што се борат со значителни предизвици за раст. Тоа го потврдува сомнежот дека порастот на услужниот сектор во август беше аномалија поврзана со Олимпијадата, која сега веќе ја нема“, ​​рече Тарик Камал Чаудри, економист во Хамбуршката комерцијална банка.