Почнаа испораките на украинско жито, но фалат бродови

Првите пратки жито од Украина од почетокот на војната, кои веќе тргнаа, се предзнак за олеснување на притисоците на глобалните пазари но, остануваат многу предизвици пред да бидат пуштени „на слобода“ заглавените милиони тони храна во таа земја.

Голема е подготвеноста на сопствениците да ги пуштат своите бродови да пловат, иако водата е полна со мини, а Русија не се двоумеше да нападне и на пристаништето во Одеса по потпишување на договорот за безбеден транзит.

Извозните активности почнаа со бродот Разони, кој што на почетокот неделава тргна кон Либан со 26.527 тони пченка. Уште три бродови испловија во петокот од украинското црноморско пристаниште, а два брода од Турција тргнаа кон пристаништето Черноморск да натоварат стока.

Сето тоа заедно значи симболичен почеток на извозот од околу 85.000 тони за една недела. Сепак, тоа е помалку од 8 отсто од тоа што Украина вообичаено го испорачува во овој период од годината. Одредени количини се извезуваат и по земјен и железнички пат, но тоа се многу помали количини отколку што може да се тргува по море. Цените на пченицата и на пченката пораснаа по инвазијата, што ја влоши состојбата со недостигот од храна во земјите, како Сомалија, кои се потпираат само на украинските производители.

Осигурителните компании нудат необврзувачки полиси за сопствениците на бродови со стапка на воен ризик меѓу 1 и 5 проценти од вредноста на трупот на бродот. Ова се информации од луѓе вклучени во пазарот. Во помалку ризичните подрачја, таквото покритие често е помало од 1 отсто.

Освен осигурување, можеби ќе мора детално да се проверат пловилата, кои со месеци се заглавени во пристаништата во Одеса, Черноморск и Пивдени, за евентуално да се поправат дефектите.

„Ќе има нешто извоз преку црноморските пристаништа, но не толку, барем не како порано“, рече Бено Фејод, аналитичар од француската Стратеџик Грејнс (Strategie Grains), додавајќи дека ќе помине доста време додека се наполнат бродовите.

Стандардните оперативни процедури за транспортните коридори се речиси готови и ќе бидат објавени кога финално ќе се договорат, рече портпаролот на Обединетите Нации (ООН).

Проценките се дека активностите во Црното море опаднале за повеќе од две третини откако започна војната, иако Русија продолжи да извезува големи количини житарици од Новоросје и Кавказ на североистокот. Црноморските пристаништа забележаа околу 20 отсто повеќе дојдовни бродови во сопственост на Турција и Русија во вториот квартал, а 20 отсто помалку такви пловила во сопственост на Украина.

Во моментов нема коментари за веста. Биди прв да коментира...

Остави коментар