Фразата „има и од пиле млеко“ слободно може да се искористи за лепезата производи со потекло од Кина што можат да се најдат на македонскиот пазар. Ако до некаде е разбирливо од азискиот економски гигант да увезуваме техничка опрема и облека, изненадувачки е што во Македонија може да се најдат дури зеленчук и сирење произведени во Кина. Статистичките податоци за трговската размена меѓу двете земји откриваат дека далечната Кина од незначителен трговски партнер на Македонија стана редовен член на листата десет земји со кои нашата држава има најголема трговска размена. При тоа, значајно е да се забележи дека обемот на увозот од Кина го гази македонскиот извоз.
Десет пати поголем увоз за неполни две децении
Од 2004 до 2021 година увозот од Кина се зголемил од 65 милиони евра на 643 милиони евра, што е раст од десет пати за седумнаесет години. Македонскиот извоз кон Кина пораснал од еден милион евра во 2004 година на 155 милиони евра во минатата година.
Трендот на зголемување на увозот на кинески производи продолжува и годинава, а од друга страна има намалување на македонскиот извоз. Имено, увозот од Кина во Македонија во периодот јануари-јули годинава изнесувал 511 милиони евра, што е зголемување од 47, 1 проценти во однос на истиот период минатата година кога биле увезени кинески производи во вредност од 347 милиони евра. Истовремено, извозот од Македонија кон Кина изнесувал 30,2 милиони евра, што е за половина помалку во однос на првите седум месеци од минатата година кога во Кина биле извезени македонски производи вредни 64 милиони евра.
Што увезуваме од Кина?
Долга и разновидна е листата производи што во Македонија биле увезени од Кина во периодот јануари-јули годинава. На неа може да се најде буквално се‘. Нова и износена облека, техничка опрема, електронски делови, возила, делови за возила, машини, играчки, памук, синтетика, хемиски производи, различни прехранбени производи (риба, шеќер, лук…дури и сирење и урда) и што уште не.
Листата на производи што од Македонија се извезуваат во Кина е многу пократка. На неа можат да се најдат , феро-легури, вино, мермер, животни, делови за шински возила, електромотори, хемиски производи и слично.
Светски поход
Кина е еден од најголемите светски економски гиганти и сликата за трендовите во трговската размена односно растечкиот дефицит се повторуваат и во случаите со земјите од ЕУ. Имено, според податоците на Евростат, во 2020 година Кина со извоз од 2.268 милијарди евра беше најголемиот извозник во светот зафаќајќи 18 проценти од пазарот. Потоа следуваат ЕУ (1.933 милијарди евра, 15,4 проценти), САД (1.253 милијарди евра, 10 проценти), Јапонија (561 милијарди евра , 4,5 проценти) и Хонг Конг (480 милијарди евра, 3,8 проценти). Кина истовремено со увоз од 1.801 милијарда евра беше втор најголем увозник во светот, а претходеа САД со увоз од 2.108 милијарди евра.
Во 2021 година, Кина беше трет најголем партнер за извоз на стоки од ЕУ и најголем партнер за увоз на стоки од ЕУ (22,4 проценти од вкупниот увоз). Во 2011 година, ЕУ имаше трговски дефицит со Кина од 129 милијарди евра, кој достигна 249 милијарди евра во 2021 година. Извозот на ЕУ во Кина беше највисок во 2021 година (223 милијарди евра) и најмал во 2011 година (127 милијарди евра ). Увозот на ЕУ од Кина беше највисок во 2021 година (472 милијарди евра) и најмал во 2013 година (239 милијарди евра).
.webp){kind=icon}