Забрзано расте долгот на државата кон фирмите. Според последните податоци објавени на сајтот на Министерството за финансии, заклучно со третиот квартал годинава, обврските кон приватниот сектор, здруженијата на граѓани и другите непрофитни организации се доближи до 207 милиони евра.
Трендот на раст започна лани во последното тромесечие. Од крајот на минатата година до септември годинава, долгот се зголемил за близу 53 милиони евра. Само во последните три месеци, долгот пораснал за 8,8 милиони евра.
Според стопанствениците со кои разговараше Блумберг Адриа, најголем е долгот на државата по основ на невратен данок на додадена вредност. Нашите соговорници велат дека има фактури од минатата година кои не им се платени. Доцнат и исплатите за услугите што ги добива државата од приватните фирми.
Блумберг Адриа вчера праша во Министерствто за финансии зошто долгот кон стопанството расте, по кој основ државата должи најмногу и кога планира да се раздолжи. Одговор на поставените прашања, не добивме.
Државата си должи и сама на себе
Колку што должи кон приватниот сектор, државата исто толку си должи и сама на себе. Согласно податоците на Министерството за финансии, вкупните достасани обврски до септември изнесуваат 407 милиони евра.
Извештајот за пријавени обврски според вид на расход покажува дека најголема ставка се долговите за материјали и ситен инвентар – 85 милиони евра, следна ставка е за комунални услуги, греење, комуникација и транспорт – 81,5 милиони евра.
Над 57 милиони евра стојат како обврски по други тековни расходи, 43 милиони се за договорни услуги, 36,6 милиони евра за градежни објекти и други градежни објекти.
По основ на плати, придонеси и надоместоци, државата должи 12 милиони евра. За купување нови возила државата нема платено милион евра.
Јавните претпријатија и здравството – најголеми должници
Со 126 милиони евра неплатени обврски, први на листата должници во земјава се јавните претпријатија и трговските друштва во државна сопственост. Од нив, најмногу обврски за плаќање имаат АД МЖ Транспорт и ЈП МЖ Инфраструктура.
Следните на листата најголеми должници се јавните здравствени установи кои имаат неплатени обврски во висина од 104 милиони евра. Од нив најмногу должат ЈУ од областа на здравството за потребите на јавните здравствени установи, универзитетски клиники, завод и ургентен центар, Универзитетската клиника за радиотерапија и онкологија и Општата болница во Кичево.
Високите сметки за струја ги зголемија долговите на јавните претпријатија под општинска власт. Нивните обврски заклучно со септември надминаа 70 милиони евра. Најмногу должат ЈП Колекторски Систем Скопје, кумановскиот и скопскиот водовод.
Општините до септември насобраа неплатени обврски во висина од 66,7 милиони евра. Топ три општини со намјмногу обврски се Тетово, Гостивар и Охрид.
До крајот на годината доспеваат уште 150 милиони евра
На овие над 400 милиони евра кои досепале, а не се платени до септември, до крајот на годината ќе се додадат нови 150 милиони евра, обврски кои треба да доспеат до крајот на годината. Од нив 87 милиони евра се обврски кон приватните фирми.
Најмногу нови обврски ќе имаат тие што најмногу должат во моментов. На јавните препријатија ќе им достасаат за плаќање уште 70 милиони евра, на здрваствените установи уште 27 милиони. Буџетските корисници од прва линија се трети на списокот со обврски од 17, 5 милиони евра кои ќе доспеат до Нова година.
.webp){kind=icon}
Во моментов нема коментари за веста. Биди прв да коментира...