.webp){kind=icon}
Енергетската криза има силно влијание врз конкурентноста на македонската економија и со тоа фирмите тешко ја одржуваат ценовната ликвидност на своите производи и услуги на странските, но и на домашниот пазар, е заклучокот од директните средби со компаниите кои Стопанската комора на Северна Македонија (СКСМ) ги имала деновиве.
Од Комората посочуваат дека компаниите ја очекуваат поддршката од Владата, која била ветена, бидејќи, како што нагласуваат, бизнисите претрпеле финансиска штета плаќајќи сметки за струја некаде и до шестпати повисоки од минатогодишните.
На компаниите им е потребна извесност и предвидливост, а таа може во овие услови да се обезбеди со неколку чекори. Порачуваат дека не треба да залажува моменталната цена на струјата на берзите бидејќи ниедна од причините за нејзин раст во иднина не е елиминирана.
„Нашите согледувања се дека државата има тесен маневарски простор за финансиска поддршка на околу 1.600 компании кои се на слободниот пазар на електрична енергија и затоа предлагаме да се разгледа можноста тие средства да се обезбедат преку намалување на непродуктивните трошоци во буџетот. Тие непродуктивни трошоци можат да се пренаменат за поддршка на компаниите, за зачувување на работните места и за зачувување на нивната конкурентоност на регионалните пазари“, посочуваат од Стопанската комора.
Воедно укажуваат дека потребно е откочување на голем број закони кои се во собраниска процедура, а кои се од интерес за бизнисот и кои можат да ги намалат негативните последици од енергетската криза врз компаниите.
Како пример ја наведуваат Конвенцијата ПЕМ, која е потребно да ја ратификува Собранието бидејќи, како што велат, е од особено значење за бизнис-заедницата.
„Таа ќе им овозможи на компаниите да ги користат привилегиите од ревидираната Конвенција ПЕМ за извоз на пазарите на ЦЕФТА, каде што, меѓу другото, се укинува забраната за враќање на царината за суровини без потекло, со што им се намалуваат трошоците на извозниците, кои би станале поконкурентни на пазарите во регионот“, потенцираат од Стопанската комора.
Според нив, потребно е одложување и на примената на прогресивното оданочување, кое треба да стапи на сила од почетокот на следната година.
СКСМ укажува и на потребата да се изнајдат механизми за забрзано носење на подзаконските и на другите акти потребни за користење на енергијата во систем од веќе изградените фотоволтаични централи, која сега се употребува само за сопствени потреби, а воедно инсистира Уставниот суд да ја изврши својата функција и да ја оцени уставноста на Законот за работни односи до делот на недела неработен ден.
Во однос на последното барање, од Комората образложуваат дека сега се наоѓаме во сосема други услови од времето кога е донесен законот.
Од СКСМ нагласуваат дека и натаму ќе бидат активни и кооперативни за да се дојде до решение, бидејќи, велат, тоа е во интерес не само на бизнисот туку и на самата држава.
