Индустриските производи за една година се поскапи за 25 проценти. Податоците на Државниот завод за статистика покажуваат дека во септември годинава цените на индустриските производи во земјава се покачени за 24,9 отсто во споредба со истиот месец лани.
Значајно се поскапени капиталните производи, дури за 75,6 отсто на годишно ниво. Следува секторот енергија, со раст од 34,3 проценти, потоа интермедијарните производи, кои во просек се поскапени за 24,1 отсто, нетрајните производи бележат раст од 19 проценти, а производите за широка потрошувачка се поскапени за 18,5 проценти. Најмало поскапување Статистика пресмета кај трајните производи, чии цени на годишно ниво се зголемени за 6,6 проценти.
Ако ги разгледаме главните сектори, тогаш снабдувањето со електрична енергија и гас е лидер на табелата, со раст на цените од 43,1 отсто на годишно ниво. Преработувачката индустрија забележува поскапување на цените на производите за 22,4 проценти, а во септември годинава секторот рударство и вадење камен има најмал скок на цените споредено со истиот месец лани, и тоа за само 3,4 проценти.
Ако навлеземе подетално во преработувачката индустрија, каде што припаѓа најголемиот дел од производите за секојдневна употреба, ќе забележиме дека прехранбените производи минатиот месец се поскапи за 24,8 проценти од ланскиот септември, пијалаците се со покачени цени за 15,4 проценти, тутунот за 21 отсто, а текстилните производи, на пример, се поскапи за 8,2 отсто. Тука не може да не се споменат и фармацевтските производи, чии цени за една година пораснале за 6,3 проценти.
.webp){kind=icon}
