Индустриското производство во септември годинава бележи мал пад во споредба со истиот месец лани, односно намалено е за 0,5 отсто, покажуваат најновите податоци на Државниот завод за статистика. Но одржливото ниво се однесува на сите гранки што влегуваат во анализата. Сепак, поединечно гледано има големи флуктуации на индустриското производство по сектори, кај едни индустрии има голем пад, кај други значаен раст за период од една година.
Така, на пример, интермедијарните производи се намалени за 24,7 отсто, секторот енергија е со пад на производството од 5,2 отсто, додека секторот рударство и вадење камен бележи пад од 33,3 отсто. Големиот пад во оваа индустриска гранка е резултат на тоа што не работеа два поголеми рудници, Бучим и Боров дол. Тие во септември запреа со работа поради високите цени за електрична енергија, но минатата недела го рестартираа производството поради моментално поприфатливите цени на струјата.
Од друга страна, поголем раст има кај капиталните производи, за кои Статистика пресмета зголемување од 49,9 отсто на годишно ниво. Потоа, производството на трајни производи за широка потрошувачка е зголемено за 25,4 отсто, а преработувачката индустрија бележи раст од 5,5 отсто.
Но, во рамките на преработувачката индустрија, кај одредени гранки се регистрираат големи разлики на индексот за производство за период од една година. Така, на пример, производството на тутунски производи е намалено дури за 87,7 отсто, производството на метали опаднало за 68,3 проценти, а производството на фабрикувани метали во септември годинава било за 30,2 проценти помало од истиот месец лани.
Во рамките на преработувачката индустрија има и позитивни примери. Производството на текстил се зголемило за 52,7 отсто, производството на кожа и кожени производи пораснало за 38,4 отсто, текстилната индустрија забележала раст од 27,65 проценти, преработката на дрва се зголемила за 42,7 отсто, а производството на моторни возила, приколки и полуприколки се зголемило за 57,5 проценти.
Исто како и производството, така и бројот на вработени бележи мал пад на годишно ниво, за 0,4 проценти, покажуваат податоците од Државниот завод за статистика.
Ако погледнеме одделно по сектори, кај енергијата индексот на вработени бележи пад од 6,3 отсто, а кај производството на нетрајни производи за широка потрошувачка има за 4,9 проценти помалку вработени во септември годинава, споредено со истиот месец лани. Кога станува збор за гранките, најголем пад на индексот на вработени во индустријата има во кожената индустрија, каде што за една година има за 18,6 проценти помалку работници, следува секторот за поправка и инсталирање машини и опрема, каде што вработените се намалиле за 11,1 отсто.
Од друга страна, се вработувало во неколку сектори. Кај производството на електрична опрема вработените се зголемиле за 7,1 отсто, кај производството на моторни возила за 10,1 отсто, во производството на хемиски производи имало за 6,7 проценти повеќе вработени за една година, а во секторот за производство на компјутерски, електронски и оптички производи бројот на вработени се зголемил за 6,1 отсто.
.webp){kind=icon}
