За поздравување се владините мерки за помош за справување со финансиската криза, но потребно е да се насочени кон најранливите категории граѓани, а неопходен е и долгорочен план за излез од оваа криза, но и навремена заштита од потенцијални идни кризи. Ваков е ставот на Ивана Вучкова од Фондацијата „Фридрих Еберт“, која зборуваше за Блумберг Адриа ТВ. Според Вучкова, мерките се добродојдени, но задоцнети, а тоа ја чини државата повеќе.
„Сите мерки во ваква криза се добредојдени, како за граѓаните, така и за приватниот сектор. Меѓутоа не смееме да заборавиме дека штом се носат мерки во време на криза, сепак тие се или задоцнети или ја чинат државата значителни средства кога станува збор за финансиската поддршка и помош на бизнисот. Тука се доведува во прашање и слободниот интегриран пазар и еднаквиот третман на компаниите“, вели Вучкова.
Според претставничката од Фондацијата, слично е и кај даночните намалувања за електричната енергија и ослободувањата на фирмите од ДДВ при увоз на електрична енергија. Тоа има за цел да ги намали трошоците за производство, што потоа се одразува врз инфлацијата. Според неа, сите тие се мерки со краткорочен ефект.
„Ефектот е само на краток рок, а ваквиот пристап генерално има тенденција да им олесни повеќе на граѓаните со високи примања кои што трошат повеќе, отколку на оние кои што имаат ниски примања и се најмногу засегнати“, вели Вучкова.
Ставот на претставничката на Фондацијата „Фридрих Еберт“ во врска со енергетската транзиција, е дека ваквиот пристап е прилично контарпродуктивен.
„Иако од социјален аспект мораме да кажеме дека мерките, на пример субвенционирањето на цените на електрична и топлинска енергија на граѓаните, најавената финансиска помош до април месец се навистина добродојдени и неопходни, сепак тие мора постепено да се заменат со долгорочни системски решенија кои што ќе им помогнат на граѓаните во справување со вака кризни состојби и воопшто со енергетска сиромаштија“, посочува Ивана Вучкова, според која сузбивање на енергетската сиромаштија мора да биде приоритет во енергетската политика.
Во делот на енергетстата транцизија Вучкова оценува дека сме на добар пат, иако секогаш моѓе подобро, но забелешките се во делот на субвенционирањето на енергетски ефикасни начини на затоплување на домовите.
„Програмите за субвенционирање мора да бидат достапни за сите граѓани, а не само за тие кои можеат да го направат она иницијално вложување и потоа да добијат помош од државата, а и да бидат доволно добро искомуницирани. За поздрав е поедноставувањето на процедурите, но тие треба дополнително да се поедностават“, сугерира Вучкова.
За тоа како стратешки да се делува на долг рок за заштита од енергетска криза погледнете го целиот разговор на Блумберг Адриа со Ивана Вучкова од Фондацијата „Фридрих Еберт“.
.webp){kind=icon}
Во моментов нема коментари за веста. Биди прв да коментира...